fbpx
22.2 C
Macao
星期二, 19 3 月, 2024

《05′ Expo 名古屋『愛‧地球博』紀行》- 十二回:全球展區2

0
上回講左全球展區3,行行下就到傍晚啦~~終於來到全球展區2,亦都是我在萬博的終點站,因為主要的區域已經行哂。 全球展館2其實係美洲館,主要包括了:阿根廷、加拿大、古巴、多明尼加、美國、墨西哥、安蒂斯共同館、中美共同館,以及聯合國、紅十字會、紅新月會、國際熱帶雨林組織。 大家一齊來看看吧! (古巴共和國) (多明尼加共和國) (阿根廷) (加拿大館) (北‧美國館) (中美洲共同館) (墨西哥) 在此區域,我最欣賞的就是墨西哥館!原因就係佢好多野睇,將整個墨西哥靚既一面都介紹哂比大家,包括河川山脈、奇岩火山、稀奇生物,亦設富有教育意義的小遊戲區域,以風、火、水、土為重點!另外大家亦被它門口的裝置及聲效讚嘆不已,是什麼?見不見墨西哥館的第二張相,那個就是一入門口上樓時見到的小型瀑布,它是噴出霧狀氣體,之後以燈光技術打光,另大家有穿越瀑布的感覺,而且每當有人經過的時候,有感應器偵測到有人經過,就會有瀑布的聲音,讓人有種聲畫合一,置身其中的感覺! (待續)還有其他冇post的相片於 "相簿-->名古屋博覽會",以及攝影的詳情資料。 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 十一回:全球展區3

0
草草咁又左幾個館,門口影影相,stamp埋d chop就快快離開全球展區3啦!不過真係好多人,你地睇上一回d相都知啦!人滿為患,一些西洋大國跟本排都排唔到tim呀! 跟住就來到全球展區3,這裡有的是西歐、中歐及愛琴海的國家,包括了:希臘、意大利、克羅地亞、西班牙、土耳其、突尼西亞、波斯尼亞、保加尼亞、法國、德國、摩洛哥、約旦、利比亞。 這個區我就真係要讚,地區空間最少,但好多館都好有特色,例如我最喜愛的希臘館,本blog的background都係用希臘館內影的一張相呀!館內設計得好科幻,而且講好多生態、地球的東西,燈光、擺設都非常之美觀,也有潺潺流水,真是非常美麗的一個館。 另一個我要讚的就是意大利館,雖然要排成15分鐘先入到去,空間比希臘館大一倍,一進入的感覺與希臘館相似,但內裡以河流及小橋作設計風格,行於強化玻璃橋上,下面就是水藍清澈的流水,好好的感覺,而且內裡亦設有舒適設計的坐椅,燈光運用得宜。走到盡頭有間房仔,寫明不准攝影,究竟是乜東東呢?原來係一個意大利出名的雕塑-----"大衛像" 的複製品。另外走廊上亦有好多繪畫的新角度及劃時代作品,令人重新審視這個藝術之國。  再來就是摩洛哥,摩洛哥內裡設計成一個皇宮大廳的感覺,真係好華麗,而且非常名貴的水晶燈,帶有中東品味的擺設及吊飾,牆身大部分用金漆塗裝,盡顯貴派!而且仲有華麗燈具、擺設售賣,真的不錯呀! 另外仲有一個唔知乜國家的館就更巴閉,點巴閉法?佢樓高3層,2樓係可以容納人係一個都幾黑既人造泳池度游水,但要登記先可以,我就係搭lift係3樓的架空橋行過往下望先見到有個外國肥佬係度游水,後來回到1樓先知,原來佢係約旦,以死海為saling point,人係果個泳池度會浮ga!而且1樓就有好多死海護膚產品賣囉! 其他果d就冇乜特別,但遺憾的是法德聯合館、西班牙館都因為太多人而入唔到去,其他的都入哂啦!(下圖西班牙館) 其他的館: (待續)還有其他相在相簿內,查看攝影詳情也請到相簿。 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 第十回:全球展區4

0
去完全球展區5,快步去全球展區4啦,因為聽到有人講那邊好多人,why?原因係日本人崇洋呀!全球展區3 & 4 都係歐洲館,而全球展區4主要以北歐、南歐及東歐小國為主,包括了:愛爾蘭、烏克蘭、英國、荷蘭、俄羅斯、捷克、瑞士、波蘭、比利時、葡萄牙、羅馬尼亞、立陶苑、奧地利、阿塞拜疆、阿美尼亞、瑞典、丹麥、冰島、芬蘭、挪威。 聽落都覺得好先進的國家來的,對不對!此區亦係最遠的一個區域,我一去到該區就覺得設計好獨特,整區的顏色用淺紫+淡紅色為main tone,街上佈滿好多大柱,頂部就設計成一朵假花似的,顏色就係main tone囉! 我入左唔係好多間國家館,因為有好多都要排隊,我冇咁多時間,因為仲有全球展區3,2未行,亦得知展區3果邊的法國德國共同館要排隊差不多200分鐘,所以我更要加快速度! 以下就帶大家遊覽一下全球展區4的各館及環境啦!(葡國)(奧地利) (英國) (俄羅斯) (烏克蘭) (荷蘭) (比利時) (瑞士) (羅馬尼亞)(愛爾蘭) (捷克共和國)(波蘭)(北歐四國共同館)這是纜車,可由會場北口的企業館搭纜車過來這裡,但要畀錢~~so我就冇搭啦~~haha~~ (待續)到相簿可觀看攝影詳情 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 第九回:全球展區5

0
去完亞洲區、又去左 全球展區6(東南亞及大洋洲區),當然又行上去那條全球環路,行去全球展區5,估唔估到全球展區5係乜野國家呢? 全球展區5 是 非洲區,包括了:南非館、埃及館,以及非洲共同館。南非館同埃及館都好有特色,可惜埃及館就要排成25分鐘先入到去囉!非洲共同館就好大,但冇乜野睇囉~~ 其實由展區6行去展區5的那段全球環路會經過中央園區,我又影左d相比大家看看。 另外這條全球環路就非常之貼心啦!有好多chair & 瓦遮頭,最重要係有水霧降溫,有相為證呀!如果唔係,係高溫34-36度,烈日當空下暴曬,一定中暑呀! 其實係全球展區5就真係冇乜野好影,只是一些好普通的場館及內部,提不起勁去影,so只影了數幅。不過可以一提就係非洲館真係好非洲,因為D自動售票機全部冇哂飲品,而d飲料販賣區排滿人群,真係體驗到口喝的折磨啦~~(南非館)(埃及館) 我係下午3點鐘左右就離開全球展區5,向全球展區4進發~~ (待續)可到相簿查看攝影詳情。 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 第八回:全球展區6

0
上回講到去完那個二井東芝館之後,我就去了比較近的 "全球展區6",這區是東南亞國家及大洋洲的國家,包括了:印度尼西亞、越南、新加坡、泰國、馬來西亞、紐西蘭、文箂、寮國、柬埔寨、澳洲、菲律賓、南太平洋共同館。 有些內裡比較靚,所以影左裡面,有些沒什麼看頭,所以冇影到,當然有一些係唔比影啦!我唔講啦~~比d相比大家睇仲好! (澳洲館) (新西蘭館) (菲律賓館) (新加坡館)(柬埔寨館)(馬來西亞館) (寮國館)(泰國館) (印度尼西亞館) (南太平洋共同館) (越南館) 之後就去左新加坡館樓上吃左個中華拉面做唔午餐,又食左個雪榚做甜品,haha~~食完就準備向 "全球展區5" 出發啦! (待續)可到相簿查詢攝影詳情 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 第七回:企業館Part 3 + 企業館夜景

0
Day 3 (即第二日入萬博會場) 同樣地好早起身,好早咁搭車,亦好早咁排係東門,準備又跑到企業館區玩埋最後的一個筍館---"三井‧東芝館",我一開門就直接衝入去排隊,只需20分鐘就可以玩啦! 東芝館玩的是動感影院,但戲中的人物就是在場的觀眾 (我被分派做工程人員~~haha~~),入到去首先要到一間房影相,因為要拎你個樣植入去套動畫既人物入面,之後就要等10分鐘,等動畫準備之後,就可以入去睇下自己怎樣啦!呢個game很不錯呀!以10分鐘極速就可以將一些人的肖像完全植入戲內,咀型夾埋對白,非常厲害!之後出到黎見到等候的人龍好誇張,等待牌又出現那個可怕的等待時間-----240-360分鐘 (高峰係480分鐘) 企業館10個鋪,已經玩了8個,剩下電力館及大展覽車是小朋友野,太普通,所以唔玩了! 附送企業館區的夜景: 待續:全球展館2,3,4,5,6(觀看詳細攝影資料請到相簿) 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 第六回:亞洲展區+企業館Part 2

0
睇完日立那個館之後就去了最近的亞洲展區,這個展區裡包括了伊朗、印度、沙地阿拉伯、斯里蘭卡、南韓、中國、尼泊爾、巴基斯坦、不丹、孟加拉、蒙古、葉門、卡塔爾、中東共同館、烏茲別克、塔吉克斯坦、哈薩克斯坦共33個國家展示單位。(我只沒有進入南韓的展館,原因係要排隊囉) 大家可以看看下面的相:(下圖印度館)(中東共同館)(沙地阿拉伯)(中國館)(南韓館)(蒙古館) (伊朗館) 之後傍晚時間就回到企業館區,去了位於另一邊的三菱館,裡面講左好多環保科技、地球科學、資源再生、極地氣候等好多問題,我好欣類呢個寓教育於娛樂的館,它的外牆亦以綠色概念設計! 最後我嘗試趕一趕最後一場(六點半開)的機械人show,之前梗係參觀左佢個show exhit.先啦! 呢個show最後一場我地需要排30分鐘以上,因為好多人都趕最後一場。Why?因為這個是人氣第二的,而且亦是同場最多機械人組成一隊樂隊演奏一曲,另外又有真人控制的劃時代新科技概念車(真車)成12部在舞台上穿梭,這個show的水準一流,是我喜愛我第二位! 之後就離開會場,準備搭車返名古屋市。返到去食個晚餐,又係我至愛既松屋,跟住就返油店養精蓄銳,明天再戰萬博! 總結第一天入會場,總共玩了山水夢境、煤氣館、日立館、三菱館、JR館、Toyota館,共6個企業館,真係冇人試過可以一日之內去了6個企業館,我就打破了紀錄! Day3 我要去埋三井東芝館就成功啦!因為大覽車館同電力館係d小朋友玩既野,我唔arm玩!Day 3其他時間我就可以行埋另外的全球展館2,3,4,5,6啦~~yeah! Day2結束想看詳情的攝影資料請到相簿區查看!編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 第五回:企業展覽館Part 1

0
上回講到我好似短跑選手咁樣,其實一D都唔誇張,因為未去之前,在網上搜文時,好多已去玩既玩家給出來的結論是不論一日定兩日都冇可能玩得哂企業展覽區的十間館,原因係這裡雲集左最新的科技所製作成的遊戲及Show,所以勁多人排隊玩(又一次見識到他們的排隊功力。)上圖就係果條路既其中一截! 我一跑到企業館展區範圍,就立即排埋去日立企業館的Fast pass隊,取時間快證。(唔咁樣做的話係絕對冇可能玩到!)最後取得1點左右的票,就要快快離開,晏d先返來玩!現在就去排其他的館玩,因為每次只可get一次fast pass呀! 之後來到山水夢境及煤氣館排隊直接入場,因為這裡排隊的時間比較小,只需30-45分鐘!相比起人氣第一的三井‧東芝館雖要排240-360分鐘,簡直係小兒科啦! 最先玩的是山水夢境內其中一個game,係睇一d科學實驗既,要帶上立體眼鏡看立體電影,之後又拿一枝零下5度冇結冰的水,一搖就變冰......不過呢個game一般,唔算好唔算差! 之後又排左煤氣館果個show,都係30分鐘左右,呢個比山水夢境那個好一點,講一個法師及火的魔法show,有d睇頭! 跟住就去get左山水夢境另一個Show既Fast pass,係12點就可以睇,就去左JR東海磁浮列車館睇野。裡面有2 part, 一部分係參觀車廂設計,另一部分係進館內了解超電導的運作及模型試行! 買過冰食下,休息一下,就到附近的OK便利店買中午飯食。 食完就夠鐘睇山水夢境的大show,這個show d特技、電腦效果同燈光都做得好好,但內容就冇乜睇頭,亦冇特別驚喜! 夠鐘睇日立企業館啦~~佢係人氣第三的館,主要係玩最新既hitachi科技,今次所有的入場卷都植入了一粒細於芝麻的晶片,用於記錄及其他有關資料,而且有好多game都要有這張門卷才能遊玩ga!入內首先就係每人派一部機,你只要在行走期間將部機靠近植入IC晶片粒,部機就可以顯示相關資料及訊息,好犀利ga!之後要還機,進入另一區坐一部車,在車上需要帶上特製眼鏡同手套,眼鏡係比你睇到立體互動的影像,而手套係比大家憑空接觸到虛擬的香蕉,用來餵monkey ga!仲有就係每個人可以揀一隻輔助員,同選擇語言。(我選擇了貓頭鷹,中文),之後我就通過佢既領航做哂一連串動作,當然包括飛3隻虛擬香蕉比d monkey食 (其實好難用文字告訴大家那個感覺,總之就係正啦!)出來既時候係2點鐘! 下圖是企展館展區一邊的景,包括了Hitachi、Toyota、Gas及山水夢境、三井‧東芝,五個館! 下回再講 day 2的後半日行程!想看攝影資料請進入相簿內查看~~編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 第四回:衝入萬博會場實況報導

0
上回講到,有好多人話我聽(包括那個的士司機及駐派酒店的『愛‧地球博』服務員),要去會場搭巴士最快,而且一定要搭6:30果班,如果唔係你根本冇可能排到日本企業館果10個科技遊戲!咁我當然要聽啦!而且我知日本人一向鍾意晨咁早就排隊~~所以我都要入鄉隨俗啦! 第二天我就晨早起身5:00左右,因為要5:30到車站,就快快起床及執拾,5:15分左右就出門。好快就去到車站,5:35分到,但已經排了60多人在前面,我已經排左去走廊中間位置!(見下圖)就是在排的位置影的,而d顏色站就是我入來的位置,見唔見又有兩位人任到來排隊呢?而萬博的車站入口係右手邊仲要下樓梯,所以其實我已經排到好後,但6:30先有首班車囉!臨開門時的人竟企都去圖中最遠的紫色牌度呀!真係好恐佈! 最後終於買左ticket以及準時於6:30分上了第一輪的專巴,由15輛大巴組成的第一輪首發!於7:15分到達會場入口車站,仲有一大段路行去東門入口!(見下圖)我地7點幾已經到會場入口,但有其他的專巴快我地一步,攪到東口已經勁多人排隊,但好彩,我地最後都能排到入直規行列中,再後一班的車已經要排左臨時加的隊列,再後d既已經要排上樓梯啦!呢張相我就係舉到隻手好高先影到冇入頭既東門,這是所有乘坐來會場的各地專巴入場的唯一閘口! 而整個會場有4個入口,分佈於會場四個角,分別是東口(專巴遊客)、南口(私家車及自家車遊客)、北口(乘的士及萬博JR線的遊客)。(這張是網上搵返來) 另外西口就係瀨戶會場那邊,基本上沒有太多人使用,因為離開超人氣的日本企業館最遠,仲要搭一程纜車先到,佢地趕到黎都已經唔駛排,一定玩唔到啦! 其實會場的開放時間為早上9時正(7點幾就走,就要勁曬,真係要讚下日本人d耐力)。但北口其實係最近超人氣的企業館,所以佢地係最遲開門,係9:05分先開;而我地東口的是主會場最遠的閘口,所以係最早開,係8:45分就開閘,而且一開閘d人就不停跑,我地都唔知咩事,跟左先算,最後才知道原來我地要通過隧道之後再跑大約一公里的 "全木製空中迴廊" ,才可以到達會場(即北閘口的樓上,仲要落樓梯先到超人氣既企業館)。(這張也是網上搵返來) 真係跑到你索哂氣呀!不過所有人一齊跑,真係好carzy,但北口d職員都好醒,一望到我地東口的先頭部隊殺到去佢地樓上就立即開閘放人入,簡直好似同我地死過咁!畀下面啦~~我地都話哂都跑左成公里ga,氣都未回又要同人爭排隊get d fast past 同排d快少少既遊戲,真憬少d體力都唔得! (待續:企業館 Part1)可到相簿去看詳細的攝影資料! 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《05′ Expo 名古屋『愛‧地球博』紀行》- 第三回:晨光的名古屋市

0
上回講左DAY1,今回就講我DAY2的名古屋之旅啦! 我第二日5點幾就起身,快快出門口就去車站排隊啦!雖然首班車係6:30先開,但駐酒店的『愛‧地球博』服務員強烈我一定要晨早出門,如果唔係你絕對排唔到D企業館呀! 咁我當然聽佢的指引啦!5:15已經出門,準備好早餐及水於排隊既時候食!當我一出酒店,我被街道上的各式各樣街頭雕塑所吸引!其實我所在酒店的街道叫 "廣小路通",係名古屋市係一條大街來的!當然我二話不說由酒店開始,一直影到去車站啦~~ 這是廣小路通的巴士大站! 廣小路通的舊款電話亭,但內裡絕對不舊呀! 廣小路通 的 街頭雕塑之一 (我改的名:躊躇的危坐)廣小路通 的 街頭雕塑之二  (我改的名:城市之腦) 廣小路通 的 街頭雕塑之三  (我改的名:UFO) 途中所見的宣傳牌~~ 廣小路通旁邊的海洋塗漆大廈外牆 街頭雜亂路標~~ 廣小路通經過的一條小河,晚上河邊有好多車仔檔,以及有駐唱居酒屋仔ga! 廣小路過橋前的大環境~~都幾靚ga! 這間是西洋式的建築,係 "加滕商會株式會社"。 咁樣影下影下,行下行下就到車站,時間已經係5:35分,都好多人啦!想繼續知?請看下回分解啦~~ (待續:衝入萬博會場實況報導)可到相簿查看拍攝詳情資料 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《05′ Expo 名古屋『愛‧地球博』紀行》- 第二回:夜遊名古屋市Part1

0
第一晚係名古屋市,梗係要周圍搵下有冇d乜野方法最方便入萬博會場啦!當我一行到名古屋市JR站後面,那些大廈太靚啦!而且成個名古屋市均充斥住『愛‧地球博』既氣氛,真係未入園,已經好有feel,而且好多店舖都有官方紀念品買ga!當然我都唔會放過啦,先買左第一輪先! 這是名古屋車站對面的建築物,有個『愛‧地球博』既波波係上面呀!好靚呀! 附近另一楝建築物上的DO CO Mo宣傳版 這是當晚搵到有直達萬博會場的專巴既車站門口,有一個指示牌  這是車站門口旁的柱,也貼有相關指示,看來名古屋市民真的好支持本次展覽!而且度度都可以見到!其實係機場已經見到好多有關的東西,真估唔到,佢地好似全城運動咁!尤如twin初出道咁,去到邊都有佢踪影,但『愛‧地球博』就簡直係勁十萬倍! 這個是名鐵巴士的車站!有個好怪的雕塑,所以影左佢!haha 就連街邊毫不起眼的盆栽都係『愛‧地球博』的宣傳,名副其實是是鋪天蓋地!最後去了一間商場內的『愛‧地球博』專櫃買少少紀念品先啦!當然~~ 買完哂野,覺得肚餓啦!跟住就去左大街的松屋(有睇開我blog的人就知道,它是我至愛的店之一),食過飯就去了便利店買d野飲同明天的早餐(因為明天要5:30出發,趕第一班專巴),所以冇時間吃早餐呀! 有好多人話我聽(包括那個的士司機及駐派酒店的『愛‧地球博』服務員),要去會場搭巴士最快,而且一定要搭6:00果班,如果唔係你根本冇可能排到日本企業館果10個科技遊戲!咁我當然要聽啦!而且我知日本人一向鍾意晨咁早就排隊~~所以我都要入鄉隨俗啦! (待續:晨光的名古屋市) 可到相簿查看拍攝詳情資料 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《05′ Expo 名古屋『愛‧地球博』紀行》- 首回:名古屋中部機場

0
《05' Expo 名古屋『愛‧地球博』紀行》第一回:名古屋中部機場 名古屋中部機場,其實係全世界第一個人工浮島機場 (意即由吹沙填海而成的海中人工島,但因為位處海域,會造成沉降、翻側、海水倒灌、地震等,嚴重的話會立即陸沉。)但運作至今,仍然運作正常,未有任何大問題,而且它已經成為了日本中部最大的機場,亦是日本中部的航空輸紐,它是日本三大機場之一。 我們所搭的ANA航班,就是降落在這個海中島機場上。這個機場非常之美麗,採用了最輕最環保的物料作主力柱及外牆,以大量玻璃增加空間感及透光度,以節約用電為原則。海中島由一條橋與本島接近,除此之外就沒有離開的通路! 終於到達名古屋啦!好開心呀!不過我們起飛前就已經知道有強勁颱風吹襲名古屋地區,所以我也非常緊張day2是否要取消進入世博會場呢? 坐了機場巴士到名古屋市JR總站,轉了的士去酒店。一路以來天氣陰沉,但未下過一滴雨,心想唔通冇事? 一直去到酒店check in完,上房間就立即開電視看看日本的新聞及天氣情況,發現了一個好消息,颱風突然轉向吹襲愛知縣(名古屋所在縣)隔離的靜岡縣,而愛知縣地區則不受颱風的任何影響。yeah~~一個大喜訊!跟全就快快出去JR站果邊行下買下野同食晚飯啦!(其實酒店距離JR站只有6個街口,步行約15分鐘就到,早知就唔駛搭的士啦!鬼叫自己唔識去酒店咩!又冇東京咁方便) 其實全名古屋市都有好多"世博"的特約商店,而好多特約商店都有 "此店限定" 的商品,當然市中心的數十間特約店啦!其他的百多個世博小店都係賣一d大家都有得賣的東西,而會場內的四個出口的限定店就有一些市中心店沒有的 "會場限定" 品,所以去名古屋之前我就已經搜尋哂d資料,知道邊一d係市中心先買到,邊一d只可在會場買到! 日本人呢d咁既限定方法,真係玩死唔少人呀! (待續:夜遊名古屋市內)(這4張相都是從網上搜尋得來的!不要誤會是我影的!) 編:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《05′ Expo 名古屋『愛‧地球博』紀行》- 序章

0
《05' Expo 名古屋『愛‧地球博』紀行》- 序章 --序--於2004-2005年間,日本舉行了五年一度的世界博覽會,雲集全球各國至此,加上日本最新的科技企業館,讓這次成為了近期最成功的世界博覽會2005。日本為了本次的世界盛事,特定用了5年時間,於名古屋郊區重新建造了一個園區,概念就是原始、環保、愛地球等。而整個園區以森林為主題,用最環保及無污染、可再生的物料製造,園佈交通工具均是無污染的。以一條木製的架空橋貫穿整個會場。日本將其定名為:『愛‧地球博』,有二個含義。其一就是 "愛知縣的地球世界博覽會",另一就是 "愛護地球、珍惜地球的萬國博覽會"。講左咁耐,可能大家都唔知係邊度,其實今次的世界博覽會位於日本本洲的愛知縣名古屋地區。 它們提倡的主題為:雖然,日本已在經濟高度增長以及工業發展方面取得了卓越的業績,然而這都是以犧牲人們許多有價值的東西為代價的,甚至至今人們還必須以追求與地球生態平衡相和諧的生活為前提。而且,人類的科學技術成果必須要與“自然的睿智”緊密一體化。在某種意義上,2005年日本國際博覽會將為全人類提供一個國際性的交流大舞臺。參觀者將在這裏接觸大自然並融於大自然,同時能再次展現人與大自然生活的無窮魅力。大會的主題包括有重點探索地球環境和人口問題的“自然的起源”、闡述關于高齡化社會和少子化問題的“生命的藝術”以及關注於開發新型能源和再生技術的“地球生態共同開發”等諸多內容。 --前言--其實我2005年的7,8月我去了兩次旅行,先去新加坡7日,之後等待有機位及酒店先再決定去名古屋睇世界博覽會。(新加坡的旅記,大家可能要再等等啦!我想寫埋名古屋這個先)終於,我的心願達成了!旅行社告知我有酒店及機位,所以促成了我今次的名古屋之行!心情非常興奮!點解?因為"世博"的關係,去名古屋的機位及酒店於半年前已經爆滿,而且又是5年一次的大事,吸引了世界各地的人士到訪,而我於6月尾才查詢,所以我都覺得好大機會冇份參與ga啦!點知又咁好彩播!比我成功左~~haha~~不過都幾一波三折ga!而且本次是我去日本當中最貴的一次,不過冇法,5年一次就豪比佢啦!放且下一屆係上海舉行,心想一定唔會有日本呢次咁成功同咁多新科技睇!你要知日本人d新科技只供本國人使用,5年後先流出日本國外ga嘛!所以機會難逢呀~~ --四日行程--Day 1  澳門-->香港-->名古屋中部機場-->名古屋市Day 2  名古屋市 --> 萬博會場Day 3  名古屋市 --> 萬博會場Day 4  名古屋市觀光 --> 名古屋中部機場 -->香港 -->澳門 --下榻酒店--Nagoya Hilton Hotel Resort (5 Star) (待續)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.
- Advertisement -
Macao
晴,少云
22.2 ° C
23.2 °
21.9 °
64 %
6.7kmh
20 %
週二
22 °
週三
21 °
週四
21 °
週五
22 °
週六
23 °

社交網絡

12,637粉絲Like
1,230追隨者Follow
21,896追隨者Follow
2,763追隨者Follow
48追隨者Follow
3,926用戶訂閱

最人氣文章