24 C
Macau, MO
星期日, 十一月 18, 2018

《06’真夏東京》(21) – 山手線巡禮之決戰上野 Part1 & 午餐[すし食べ放題]

去完淺草,我地又係搭地鐵去左上野廣小路站,我地要進攻阿美橫丁啦! 一去到就見到好多人呀!一早只不過11點左右就已經人頭湧湧啦!我梗係二話不說,就先帶大家去左一間我極力推薦畀各位自助遊日本人士,以批發價去掃平食、掃帆立貝的店舖,旅行團絕對唔會黎ge! 佢叫 "二木の菓子",有二間店,係打對面ga!好易搵~~而大家都係裡面放低左唔少時間,亦放低左唔少錢囉!不消半小時,大家已經2,3個超膠袋出來啦!大家亦買了唔少特大包既帆立貝!(之後我地返黎係八佰伴見到,不過一小包就已經等如我地特大包的價錢,即大約120元澳門幣) 仲有好多草餅、燒餅、麥茶、綠茶、羊羹......好多好多!尤其是S小姐,簡直進入了瘋狂狀態,暴走上野既二木の菓子,結果買左成4大袋,仲要即場買行李箱packing d野先可以繼續行! 完全被二木の菓子吸引住~~不能自拔!所以我極力推崇,而家應該知道點解我成日叫人去日本自助遊要帶多一個空行李箱,因為你真係唔夠裝!但你係跟團就唔洗,因為係唔會點樣買到平野!跟阿乃去日本shopping同睇靚景、浸溫泉、體驗日本文化一定冇錯ga啦! 行完哂,大家滿載而歸,我地準備返去上野駅啦!突然有人提出一個問題,就係:『我地好似仲有玩具店、銀座都未去播?』我答:『係呀!』佢地就:『死啦!我驚拎唔哂d野呀~~而家已經咁,真係唔可以諗夜晚點返酒店!OMG~~』我:『我一早已經講左今日係血拼同體力勞動日ga啦!等你知道日本都不知幾多平野買!』 說著說著我地就回到上野駅,第一件事就係找Locker,而且仲要搵最大Size果隻囉!最後我地用左3大個Locker先可以擺哂我地6個人既野囉!好誇張~~ 擺完野就係上野駅發現有一個南極展,我地又忍唔住要影下相先啦!但我地個個都已經餓都死下死下,我個肚已經係度狂響,而且我有少少胃炎,唔可以餓,所以我地真係飛快咁影相,然後走出上野駅,向我地既 "壽司任食店"出發~~ 係地鐵站攪Proof都好有諗頭囉!而且真係好吸引呀~~ 好快咁我地就黎到我為大家安排,食到夠食到嘔既任食壽司店啦! 只需要1280yen就可以任食,我就覺得好Ok啦!但我的團友話d壽司料唔夠大唔夠長,而且d壽司用機打出來既~~其實港幣80多元,有任食,而且又三文魚、吞拿魚、櫻花墨魚、鰻魚、蟹子、貝、蝦、北寄貝......都係o係港澳比較貴既壽司,仍然畀你任食,算係咁啦! 我地都唔知叫多幾多盤(佢係一盤15件),多似都有差唔多10盤啦!仲好似有人想叫d手卷tim,雖然都係任食,但好唔抵,d飯咁多~~最後大家都好夠飽啦~~好滿足咁走出來!(ps.係日本大部分食店都o係唔可以食剩野,因為佢地覺得你好浪費同冇禮貌!如果食剩的話,佢地會同你逐件計,到時你就真係和味無窮啦!) (待續:山手線巡禮之決戰上野Part 2)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

向東京出發2006!(前奏篇)

大家對上一篇都有好多回應,今篇適逢我的預算案已經做好,而所以的價目最終都落實左啦!所以現在貼出來的是最新最準的預算案版本,為version 7.5。 這個預算案係7月9日--7月15日(total:7天)的東京之旅預算案!共有6人一齊去ga! 其實今次應該係第五次遊日啦!記得第一次係去富士山及富士五湖的睇景團 (跟團);第二次就係去九洲的豪斯登堡其阿蘇火山 (跟團);第三次就係2004年同一班friends由關西(中部)玩到關東,亦係第一次做guide & plan行程;第四次就係2005年去名古屋的世界博覽會;而今次就係第五次出戰日本,2006的東京真夏之旅。 心情其實都好興奮!因為同一班friends一齊去東京,但亦有一個責任在,因為只有我一個有多次遊日經驗,大部分朋友都未去過日本,因為佢地冇諗過自助遊,以及以港幣7500元左右可以包埋所有野去日本玩到7日囉!(有關預算案遲d我先公佈比大家呀!) 需要我地半年前已經籌備我地既東京真夏之旅,但因為大家時間的配合、行程及航班的問題,而一再更改行程! 於一星期前就得知,原來我們去東京的時間適逢 東京迪士尼海洋五週年 的日子,所以特地更改到訪迪士尼的時間,為了這個5週年!(自助遊就係咁好玩!分分秒秒都在變!)而且亦知道六本木hill的藝術館在我們到訪期間展出Pixar的動畫20週年展呀!唔知Pixar係乜?佢就係製作:反斗奇兵、蟲蟲特工隊、怪獸公司、海底奇兵、超人特攻隊......以及本週末上畫的《Cars》既動畫公司。今次佢地係六本木更展出手稿、動畫模型......所以我唔去唔得啦! 我趟旅程應該會有好多驚喜呀!訂機票及行程又一波三折,而且我出比班friends的旅遊行程及指南小冊子,已經由version1.0 改到以家的 Version7.0版本la! 明天還要趕起迪士尼海洋遊玩一天的程序表,呢幾日仲要做哂d未完成既工作、會議咁!真係旅行前已經精力耗盡啦! 預算案:   項目       日元JPY       港元HKD       船票(來往港澳) $144 (以2套免費+3套240,除開5人計)             144       機場快線 (以優惠套票計算)             99       機票(來回香港) + 燃油附加費 + 機場稅 (全包)             3000       旅行保險 亞洲地區 7天 Mop 121.80        118       東京東橫Inn jr.池袋北口I  6晚 –p.s.每晚4620yen(雙人房2人住計)       27720       1857       平日交通費*5日 –p.s.每日1000en       5000       335       食用費* 6 –p.s.每日3000yen       18000       1260       入場費及套票:       (池袋) Ice-cream City ¥300 + Namja Town...

《06’真夏東京》(42) – 東京迪士尼海洋 Part XI 離園篇

終於睇哂d show,玩盡哂個disney sea啦!當然大家爭取時間去紀念品店去shopping啦!不過我一向對呢d咁貴咁童真既野都唔係好有興趣,所以我只係o係途中買左一set 5週年杯碟、5週年既毛巾,以及果個龍捲風之外,冇其他野ga啦! 之後大家就出返去入口區域個大地球度影下相囉! 仲記唔記得日間呢度係點既呢?日頭靚定夜晚靚呢? 迪士尼特色街燈呀!夜晚係靚d ga! 個地球真係估佢唔到,竟然夜晚係靚成咁囉! 背後的迪士尼線列車站都好唔錯,形成了一個對比!童話 vs 現實 (待續:東京迪士尼海洋(五週年首日) 番外篇)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(05) – 池袋北口Toyoko Inn(東橫Inn)

終於到了池袋站啦!我地在日本的據點,係位於池袋北口文化通り的Toyoko Inn 北口第一館。 到了北口,我又回到兩年前熟識的地方,因為兩年前我到訪池袋時,我地既落腳點都係呢度,不過唔係住呢一間,係住Toyoko Inn jr北口,但唔知點解今次就冇左呢間,聽聞好似重新裝修緊,所以冇得住(我好懷念果間800蚊一晚的豪華套房呀)! 由北口一直行文化通り三個街口就到啦!有好多人都問我點解要住呢間INN,有乜好呢?第一.係因為我次次來日本都係住toyoko inn全國各分店,佢就好似 holiday inn咁,間間d品質同服務都一樣,有保證。第二.因為佢每一間的大堂都設有2-3部免費上網的電腦,供所有住客使用第三.佢亦有超平的長途電話,只需100yen(hkd$6.7)就可以打3分鐘返去(係任何地方呀)第四.每日有免費的早餐供應,需不豐富但可飽肚第五.位於交通要點的池袋囉第六.當然係價錢平啦,600幾就有一晚 講左咁耐,不如比大家睇睇d相啦!大家可能下次去日本會選擇呢間都未家呢!這是酒店的大堂Front Desk~~在網上訂房唔需要畀任何費用ga,黎到呢度先畀ga~~ 這是大堂左側的免費使用電腦,我用緊右邊呢部~~做緊乜?係度睇緊你地d留言同回應,以及貼文囉!隔離果位係K小姐隻手,係度msn緊~~haha~~ 這就是酒店大堂,同時又是早餐飯堂,而圖中右側就是Fax機同100yen長途電話! 雙人房內一景 書檯連電視呀! 免費茶包、電熱水壺、保險箱! 檯上電話及風筒,仲有一個寬頻插頭(當然按用量收費),只有大堂的是免費,如果用無線寬頻都係免費 空冰箱一個,可以畀你買野飲、雪糕返來雪呀!我相信好多人會咁做,因為每次去到日本一定會試佢地既不同飲品,日日次次都唔同款~~haha~仲有好多好平既雪糕~~ 這是浴室,酒店係選用shiseido既衛浴用品! 酒店設施就睇完啦!其實仲有酒店的洗衣房、乾衣房、製冰機等都冇影來介紹!雙人房(不論twin or double)都係同價:9240yen(每間toyoko inn都不同)係非常抵ga酒店!比香港的酒店差不多大小! (待續)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

《06’真夏東京》(26) – 晨早遊原宿~明治神宮

HELLO~~大家好~~我地今日已經黎到第五日啦!晨早9:00已經到達我地第一個目標,就係明治神宮。這是當時最受重視同神聖待遇的神宮,守護著整個東京都的命運ga! 而明治神宮門前對開的一條路,並命名為『表參道』(即係今日被受追捧的名店街),即為參拜必經之路。 這是明治神宮門前大鳥居呀! 門旁日式路燈 工人掃落葉出來的一條樹葉路~~ 綠葉的天空走道! 晨早去有個好處就係人不多,係看看,成條入神宮之路都冇乜人ga! 綠葉天空的交錯! 行到一半的時候,路旁就會出現好多神社都有既酒筒,而且色彩斑斕tim~~ 行左成20分鐘,好迂迴既入神宮路,終於到達神宮正門啦!(我都唔明點解個個地方d宮、寺院都有條長長的路先可以入去,由大門到宮正門真係可以行足20分鐘!都好唔符合快的原則!) 黎到神宮,梗係要求返d平安符啦!呢度比淺草寺款式種類更多!價錢都差不多啦! 呢對係入神宮既側田,d花紋好靚,而且好有懷舊味!看得出佢係經歷過不少風霜雨雪的洗禮! 呢張既重點唔係睇我,而係我身後的構圖,斜線式構圖,配出多個該細的日式四方紙燈,運用景深的原理拍攝ga!(Thanks K小姐幫手jar機) 呢d係『繪馬』,即係寫d祝願、祈求既野上去,求福求成ga!因為塊木牌都幾貴,所以我地冇人寫囉! 正所謂『入屋叫人,入廟拜神。』,神婆又點會唔做呢d野啦!對不對?我亦教左K小姐 & 水貨女王 如何在日本寺廟參拜!如下~~ 教完人,自己都要求下野啦~~求d乜?梗係唔比你地知啦~~你地當我傻ga咩~~ 影完相,求完福,求埋平安符,完成一切事,就走出神宮啦!去到神宮內的『洗滌之泉』度! 我地係呢度只作潔淨雙手,據傳統說,神宮寺院的泉水係可以洗滌衰氣,迎來運氣的! 但要記住先請左手,後洗右手呀!據說是左入右出的原理!亦可以祈個福ga!haha~~呢個係明治神宮的大門!(由入左影返出去呀!) 唔知大家對呢輯神宮相有乜野評價呢?大家去日本有冇去過神宮呢?入去做左d乜? (待續:原宿 - 竹下通)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(20) – 東京都巡禮之重遊淺草

2006真夏東京 Day4 東京都巡禮 - 淺草 終於寫到day4啦!已經成20篇,都唔知寫到最後係幾多篇呀~~haha~~唔講咁多,又係睇相說明啦! 今日一大清早就來到這個任何遊客,來日本必到的地方,除左富士山,應該就係淺草啦!這裡有好多古式建築,同時近年亦有好多新建築物出現!古式代表就梗係 "淺草雷門"啦!有套日劇龍與虎都係用淺草作背景ga!新式代表就首推下圖啦!(唔記得左佢叫乜,總之就係設計大師的作品,好似一圈金火咁啦!) 我地今日係搭地鐵去淺草,160yen一程! 大家可以看看私營地鐵Metro的地鐵路線表呀!(在車廂內嚴禁用閃膽!) 係淺草地下鐵內發現左一幅好靚的壁畫,係將淺草的特色、名產的元素都放入壁畫中,色彩斑斕。 這就是淺草地鐵站出口,最近淺草寺的。現在進行美化整治工程,所以附近工程進行中。 呢個係淺草寺對面的政府機構,係遊客諮詢中心! 大家看看,呢個就係淺草雷門啦!(呢次已經係第4次啦,真係有d悶啦!)一大清早就好多鬼佬遊客,亦見到兩個香港旅行團,攪到一大早就好熱鬧! 呢個係雷門旁的古式牌塔以及楊柳,保存至今呀! 看看由雷門直通入淺草寺的仲見世通,商鋪都未開哂就已經人滿為患啦!留意下圖中間懷疑香港旅行團的少女團友,我係影完相之後先冇意中發現,佢個超爆笑表情,笑到我死!(大家睇唔清楚就可以去 相簿-->真夏東京 睇大圖)可能佢覺得自己影得唔好,所以個樣扭曲掛~~不過佢就破壞左我呢張相既美感,如果我一早發現,我就等佢行開先再影多張。 呢個應該之前有進行修復,因為上次來的時候係冇乜顏色,好殘咁ga!大家可以睇清楚底部,寫住係松下電器ga! 仲見世通的售賣雨傘、帽的鋪頭! 仲見世通的售賣糖果、人形燒、和果子等特式食品的鋪頭!值得留意的是圖中間的三個大胸布甸,唔知係咪食左會變成咁呢?(好明顯係扼d無知少女,又或者係純粹攪鬼!)香港/澳門我都見過有得賣~~ 仲見世通的售賣特式紀念品的鋪頭! 呢間係仲見世通售賣人手編織的布袋、手袋的鋪頭!我見到好多都好靚ga!不過價錢都好靚囉~~ 呢間係仲見世通的售賣布匹、和布、做和服的鋪頭! 呢間就係仲見世通街口第一檔,賣人形燒的鋪頭!我地個個都掃左唔少貨返去做手信呀!(我的朋友,唔好懷疑,買比你地既人形燒就係o係呢度買ga!) 呢間係仲見世通售賣和式包裝盒、財布、小手袋及各式和服配搭物件的鋪頭!就連鏡盒都有,全部都係和式包裝! 呢間又係一間名正言順的紀念品店!林林總總,各式各樣的紀念品堆積如山。 呢間係仲見世通售賣西洋絲絹為主的鋪頭! 又係一間特式食品販賣店! 呢條街如果要認真行,真係有排你行呀!不過我地興快刀斬亂麻,arm就入唔arm即走,所以我地只有了45分鐘! 講返來淺草的重點先啦!通過一大條購物術之後來到淺草寺啦~~ 又一張藝術相啦~~(自誇第n次) 寺內人流不多,但就出奇清涼,與外面的炎夏酷熱差很多啦! 來到這裡,我地亦入鄉隨俗,求返枝籤啦!我地亦拍下怎樣才是正確的日本求籤步驟及方法,不過唔比得你地睇!如果唔係咪知道哂我地求乜野,係好定唔好囉?haha~~ 求支籤只不過係100yen,算係平啦~~ 求完籤梗係要去求平安符啦!我求左幾個,分別係唔同既用途,有一個掛係車度,係保行車平安ga! 呢條係旁邊一條行道,應該以前係d僧人由僧舍行入淺草寺的通路,因而得名! 我地係門口同當地的土地公(日本菩薩)影返幅相留念先! 最後我地就行返去仲見世通,因為已經超熱,而且今天係一整天shopping同體力勞動,所以大家都買返個刨冰涼下先啦!我係蜜瓜味,S小姐係士多啤梨,K小姐同C先生就係波子汽水味!至於L小姐同N小姐就冇食! (待續:東京都巡禮之決戰上野)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(45) – 踏上歸途[NEX’ — 成田機場]

我地終於由酒店乘著細雨步入池袋JR北口,準備再一次與日本暫別啦!由於我地有好多行李,d行李仲係好大件(個個都擴充成大行李箱),而且我地又有眾多女士,那我當然就要背負著bell boy的工作啦!將d行李逐件逐件搬落樓梯,因為地鐵站冇lift,所以要行樓梯。(不過呢件事係04年已經做過一次,所以今次再做已經有過底啦!) 就係要控制時間~~ 最後我地經過一輪搬落地鐵,再入閘,之後再搬上月台,3點正完成,上到月台不消5分鐘,NEX就來了!真係未"抖"夠囉,又要搬野上車! 看看NEX的車廂,係好舒服ga!我地係池袋上車,由於預book車票,所以暫時包左呢car車廂,除左我地6個,就冇其他人啦! 又貼一幅車廂藝術相先! 再來一張!呢張你可以睇到架車開得好快! 大家可以看看下面兩幅圖,左圖全部都係我地既行李。右圖的上、下都係我地,但中間唔係我地!(左圖第二排橙帶,第三排黃綠行李帶的是我的行李,其他都是他們的誇張吧!)我地霸哂人地成car車既行李櫃呀!呢幅係每一車廂就有的位置圖,原理同香港機鐵一樣,只不過日本野靚好多! 終於到了成田第2航樓的JR站啦!你睇下我(中間白色衫),一手一行李箱就可以好輕便咁行!(仲有當日我都好似地盤佬~~HAHA)你看看N小姐、K小姐,又有行李箱,仲要一袋二袋~~真係嚇人! 各位,終於踏入成田機場第2航樓的範圍啦! 再pan一幅比大家看看!居中的就是水貨女王,你看看!佢係我地行李之冠,總數,一個人已經8件!你都咪話唔勁呀!佢後面的是C生、N小姐同K小姐的行李,三個人兩部車都係10件~~我地排隊過機呀!入機場需要的保安措施~~ 呢個係介於成田第2航樓及JR站之間的Information Center~~ JAL特設的自動check in系統~~(當時仲未運作ga!) JAL counter啦~~我地都需要排隊啦~~ 你看看大家的行李,是否很誇張啦!K小姐更揚言,下次唔再跟我去日本,因為佢carry到就死! 見唔見呢,係我地後面果d都係跟團既港澳人,有東瀛遊、永安團,但我地d行李比佢地多成倍,由此可見,跟我自助遊絕對係又抵又買到好多野,隨時買到你手軟~~(自誇口碑中......)其實我地咁多行李都好驚overload ga!(其實唔係驚,係一定過硬!)但好彩,過左成10kg佢都冇收我地錢,好好人既地勤呀!真係人又靚,心地又好!(點都要咁講既) 好快咁又入去禁區啦~~係日本既最後一刻啦~~唔知下次係幾時再來東京呢?比大家看看JAL鐵翼的陣容啦~~ 呢隻係我地搭既JAL舊版!但裡面d設施已經翻新左ga啦! 我係今次係94號閘呀!呢班機有好多香港人,亦有一批日本人,仲有一批黑人(睇個款似去香港做show ga!但我真係唔識佢地,估計都係d唔太出名既樂團!) 各位,最後一刻臨上機前,大家都唔放過間小賣店,用盡每一yen,又突顯左我地唔想走,繼續買野既心!不過買還買,唔好買到唔記得上機呀! 同場加映禁區內的飛機相片展覽,入選之作!再加映:池袋超大粒章魚丸!佢係我果日既早餐呀~~(係60階通內,好易找到!)芝士味係最好食呀!其次就係原味囉! (待續:踏上歸途2)詳盡相片資料及其他沒貼文的相片於 內。編/攝:阿乃另攝:N小姐、C先生 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(16) – Day3午餐 [台場玩樂購物行Part3]

Day3Part3  午餐於 Venus Fort 內 Penvue Parks 這間店好有歐陸式呀!好靚既裝修,而且仲有好靚tim呀~~最特別既地方,係佢畀狗狗入去一齊食ga!呢間店叫Penvue Parks呀! 呢個這係今日既set lunch 精選啦! 這度就係售賣counter啦~~我地每人都係食左 980yen (即66元澳門幣),都算係一個set lunch,一個飯加一杯飲品囉! 看看~~呢個就係我既餐啦!一杯蜜瓜梳打 + 一個咖喱牛肉湯飯味道方面都ok,不過d咖喱就稀左少少,但味都夠既~~ 店內環境係好好格調ga~~下圖~~ 牆上仲有靚靚圖tim~~ 呢個係另一邊既水吧位~~而日本好多食店都係客人會自動自覺執拾食完既野~~所以垃圾筒都寫得清楚,費事你攪錯丫嘛! 食完之後,大家見到一間夾公仔機既店,又蠢蠢欲動想夾,不過我同L小姐就冇乜興致,走左出去等佢地之際,比我地見到一駕買捲筒班戟的車仔,但由於佢唔比take photo (相中右面有個牌寫住),所以我就走到好遠,用相機6倍光學變焦的功能Zoom埋去影~~haha~~ 等左一陣佢地都出來了,咁我地就向對面的Mega web出發,我期待已久的toyata車展、電子車、F1賽車及遊戲我來了...... (待續:Mega web)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(36) – 東京迪士尼海洋 Part V 美人魚礁湖

從阿拉伯來到小魚仙、海底奇兵既駐紮地!一來到這區,佈置得好像海底世界feel ga!珊瑚、蚌、海螺......狀的建築,都幾唔錯!仲有就係呢度同其他區域最唔同的地方,就係全室內,一座building為主體,仲有一個室外過山車,就係咁多啦!唔講咁多,又係靚相時間~~ 佢地好想係呢個檔口買野食,買野飲ga!不過最後冇賣~~ 呢個就係N小姐、C先生去玩既小魚仙過山車! 就係佢地玩過山車的期間,我地就周圍行,周圍影囉!又來一張藝術相~~ 礁堡building!都幾特色ga! 呢個就係入口啦!仲有個服務員企係度搔癢tim~~ 我地梗係唔比佢有機會蛇王啦!haha~~我賤咁叫佢幫我地影幅合照!不過只有我地四個(從左):L小姐、我、K小姐、水貨女王S小姐另外兩位去左玩過山車丫嘛,所以唔見佢地囉! 之後大家會合左,入去礁堡內就已經有海神同佢既坐駕,海豚歡迎我地啦! 呢度係後面影返出去!(因為有d水泡不斷向上,幾靚ga!) 礁堡內,有好多d小朋友遊戲~~又係唔arm我地玩!d 咖啡杯、旋轉木馬咁囉! 不過裡面真係幾靚囉!幻彩配各種不同的燈飾! 阿龍蝦住果個礁石呀! 仲有好多八爪魚呀!龜呀既雕塑~~ 其實我地影完相之後,我地去左睇美人魚劇場ga!只不過冇影相之嘛!睇完野之後,我地係裡面食午飯ga!(下一篇介紹) 之後我地就去左美人魚既商店,係果度佢地都買左野!我都終於開齋買野啦!我其實一早睇中左隻毛巾,我每次去d樂園,都見d日本仔次次掛d毛巾係頸,又可以防曬傷頸,又可以抹汗!so我都買左一條囉!而L小姐晨早已經開始大買特買啦! 下圖係離開美人魚礁湖時的5週年雕塑! 又見到一d特色小攤檔,我地又玩盡間鋪,個個係度試d頭飾,我呢個梗係魔法師米奇啦!佢地都試唔少ga!我地試左,影下相,之後就走人,乜都冇買!haha~~買黎都冇用ga啦!對不對? 呢個係美人魚礁湖的旗幟!(加入左水的紋色,配以圓形的燈,蚌殼等裝飾!) (待續:東京迪士尼海洋(五週年首日) Part VI)詳盡相片資料及其他沒貼文的相片於 內。編/攝:阿乃

《06’真夏東京》(12) – 購物大割引の新宿閒逛

我地去由橫濱來到新宿時已經係下午四點啦!一出左地鐵站,我地就迷路啦~~因為呢個出口我未出過,所以唔多識行,大家一齊研究左個地圖好耐,終於咁到出路啦!我地想去既係一條百貨雲集既街! 街中有伊勢丹百貨、無印良品、0101jam、0101city、0101young、sakuraya多間店、仲有好多名店tim~~ 我地首先行左伊勢丹百貨(上圖)先~~因為L小姐要買ANNA SUI既野,當然係大有斬獲啦!仲買左好多港澳冇既系列tim,咁誇到連人地d樣板,香水紙板全都搜羅回來,認真誇張!而我同K小姐就上左樓上的Bubbery度睇袋,因為佢想買,又要幫人買,而我有個friends都搭我買呀!所以就上左去睇,其實呢間d款都多,但K小姐話唔係太多,所以就冇理啦~~因為往後我地會去不同區份的專門店!so就落返樓下找他們囉! 之後我地就過左對面既0101city,佢賣既野都好靚,唯獨價錢都好靚囉!我地睇佢d新出既 "浴衣"(即夏天版和服),我其實已經有2套ga啦,夏天係屋企著,都不知幾清涼呀!咁佢地咪又心郁想買播,咁我係男裝就方便d,但女裝其實都好複雜,只係薄一d,同夏裝版既男裝好唔同囉!而且仲萬萬聲,梗係個個唔敢買啦!話哂就係第三日姐,而且我話比佢地仲會去平價商店(淺草區 & 上野區),可以都會有更平,甚至平都笑既,到時就蝕啦!再者我地住既池袋一樣有0101city,可以唔駛咁快決定囉!(下圖0101city) 之後我又影左幾張日本的公共設施,有靚靚電話亭~~ 又有kawaii公仔既都營巴士巴士站牌~~ 之後我又影左名店 Louis Vuitton的門面,只可以係對面街影,如果唔係會比實Q趕ga! 仲有Tiffany & Co.既店,間店個門面好得囉~~又有雕塑又有鐘,完全係藝術作品咁囉! 而且我又好好彩見到一對情侶著哂和服出街,好靚呀!所以就影佢地~~個女仔好靚呀!佢地唔知我影佢地ga~~haha~~我係偷影ga~~ 之後我地就準備去無印良品睇野之際,我地個個都好肚餓,咁我地就要食左飯先啦!如果唔係冇力再行呀!食飯詳情,請留意下一篇:Day3晚餐,係食日式燒餅,仲要自己落手落腳燒tim,好好玩ga~~想知就要留意下一篇啦!hehe~~到時大家拎定紙巾抹口水,包你地口水流呀! 食完飯之後我地就去左無印良品,佢樓高4層及地庫1層,賣既產品同香港既差唔多,咁當然多好多野啦~~不過係廚房用具,傢具等比較多囉! 之後又影左一個將入黑的新宿街頭~~ 之後又閒逛左新宿呢條街好多間電器鋪,有人睇中左d電話,又有人睇中左d mp3機,又有人睇中d PMP機呀!但我要提醒大家,外國人係唔可以買日本本土既電話既! 而家連prepaid phone都唔得,因為改左手續啦~~好彩我上幾年前來日本已經買左,而家可以增值就用得返~~haha不過我諗要問人借多一個先得,如果唔係下次得我有都冇用,都通唔到信囉! 下面呢幾張就係新宿大街既夜景,好靚既霓虹燈牌呀! 中間好似堡壘咁既,其實係Karaoke館呀~~係都咪話唔驚呀~~成幢澳門英皇酒店咁呀! 仲有一張以街燈作襯托既新宿街頭~~我地影完相就去左新宿好出名既 "激安之殿堂",出哂名抵ga!我都買左一個袋同一d零食,而其他人都大有斬獲ga!(因為我比大家1小時,但要睇5層既野,而且仲好多人tim~~比錢就要排隊呀!) 結果大家都好快速咁買野,真係諗多一分鐘都唔夠時間呀~~最後成11點半走,但我地發現地下商場連接地下鐵已經close左呀~~so我地勁驚要行路or的士返池袋呀!(你知日本d野幾早close ga啦,地鐵有d只係服務至11點)不過最後我地跟住d人群由大站入口落地鐵,好彩我地趕到最後果2班車,好驚咁返到池袋~~day2完~ (待續:day2晚餐--日式燒餅)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(32) – 東京迪士尼海洋(五週年首日) Part I 入園篇

haha~~終於黎到第六天東京之旅啦!明晚就要回澳門啦!真係有d唔捨得呀~~不過值得開心既係,我地專登plan係今日先去迪士尼海洋係有目的ga! 點解?上一篇我已經有透露過,就係2006‧7‧14係迪士尼海洋5週年慶典既第一日,所以勁多show,而且係出發之前,我已經plan左一個玩盡全sea既計劃,睇5個show,玩哂所有機動遊戲tim~~ 唔講咁多野~~去片! 首先,我地一早就從池袋出發,搭山手線去品川再轉車搭舞濱線去到舞濱站下車(東京迪士尼、東京迪士尼海洋、迪士尼渡假中心的所在)。 出閘後就發覺好似去左另一個世界咁!完全都東京都個feel唔同,有d童話,有d歐陸feel咁!(但其實睇d旅遊雜誌,香港果個抄日本呢個,差唔多一模一樣呀!)說時遲那時快,就會一架迪士尼專鐵行過,我地立即影影影~~~ 呢度就係JR舞濱站出口,需要步行3分鐘過對面的Disney resort line~~ 對面的Disney resort line呀! 呢個就係迪士尼線既入口 又有一架列車經過啦!今次係黃色呀~~ 入左去迪士尼線的車站,影左幾張隨意拍! 係車站已經裝飾左好多好多5週年既相關野啦~~(大家記住,只係sea果邊有慶典,land果邊完全冇任何慶典ga!)下圖係車站有慶典限定的迪士尼手繩,有儲值功能ga!呢度就係車站的自動車票售票處,已經佈置左5週年既banner,真係做得好一絲不苟呀! 你看看~~勁多人囉!雖然係首日,都唔好咁好日本人黎先得ga!你地慢慢黎啦~~咁近~~留返d位比我地d外國人好播! 呢d係紀念車票,有好多唔同既款~~ 入閘口~ 入左閘呢,兩旁都係好多好靚既壁畫,亦有好多新加的5週年雕塑公仔! 呢個就係迪士尼線既站圖! 又一幅壁畫! 大家謀殺菲林最多的地方就係呢度!米奇佢地以車長的服飾示人呀!我等左好耐先等到冇人走埋去影相!(得2秒鐘左右咋!) 呢個列車的安全門,佢地係半身高的,唔係香港果d成幅玻璃牆咁! 列車內部~~係咪激似香港果架呢? 終於來到第三個站 Disney sea站啦! 有過有得意既銅雕,梗係要同佢影返將相先啦! 呢度就係SEA既入口及賣飛處! 他們已經唔等我,一支箭咁標去買飛啦!(咁我鍾意影相丫嘛!大家等等我啦~~) 睇下D飛,有3個款ga!完全已經轉哂5週年做background啦~~(待續:東京迪士尼海洋(五週年首日) Part II)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(28) – 原宿~Day5午餐 Caffe Solare

行完原宿站周邊,都未入竹下通,我地個個都已經有斬獲啦!今次果真係處處大減價的減價月,唔變購物狂都唔得啦!成12點半,我已經好肚餓啦~~ 正當阿K小姐、N小姐+C先生、S小姐佢地係竹下通的頭一間鋪頭揀緊耳環、頭飾的同時。我同L小姐就去左下圖呢間超好味既意大利面咖啡搵位坐,準備食午餐! 呢間係叫Caffe Solare的食店,出左好多個set lunch~~而我仲睇中左個tim~~ 二話不說入左去等位,好快咁我地就霸到兩張檯啦!Yeah~~真Lucky~~你地看看吧台,d cake同布甸好吸引呀!可惜我地係食午飯,唔係high tea囉! 呢個就係我叫既set lunch~~白汁香草牛肉碎燴意大利麵 + 冰桃茶  只需940yen (約港幣$62),算係抵ga啦!味道分數:8.9分 (yummy yummy) 當我叫左野食之後,佢地揀頭飾黨到啦~~亦都好快咁揀左心目中既set lunch,開動啦!因為我地今日都係幾趕ga!仲有好多地方未去! (待續:原宿 - 竹下通)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(01) – 前傳

各位blog友及朋友期待已久,亦多返催促之下,終於登場啦!本遊記定名為 《06'真夏東京》,預計連載30篇或以上,張貼的遊記相片更多達800張以上!因為早前一直在整理相片,亦因數量眾多,要慢慢製作及分類需時較長,望請見諒! 現在先回貼一些之前的整理資料,讓各位有一個初步的了解本次旅程! 之前的有關貼文:向東京出發2006:(前奏篇) 向東京出發2006:在日記事手稿 希望大家看一看d預算案、行程安排等等,咁就可以做一個比對嘛!對不對! 編:阿乃

《06’真夏東京》(48) – 番外號:特色地磚與石柱

上一篇講左好多戰利品,今篇就講講特色地磚及矮柱啦!同我之前寫過的一篇日本坑渠蓋一樣,不過今次我去就發掘到地磚同矮柱仔! 去片,呢幅係橫濱山下公園附近的的路面,畫左好多西洋野既地磚!why呢?原因:大家讀歷史應該都記得日本曾經鎖國ga!開放之後,橫濱就係一個主要的對外港口,好多洋人都會來這裡登岸,所以呢度都幾有日西特色ga!係山下公園的庭園及街燈就已經知啦! 呢幅地有9格,全4款的圖案!包括有橫濱燈塔、西洋人、遠洋船同外交使館四圖! 這是每行數十米就有一格! 可惜我找不到第四款的外交使館!不過算啦!有幅全圖都當有齊ga啦! 之後就係到上野部分,大家可能去上野血拼多,但可能冇留意地下有好多正野ga!都好特色下,起碼第二個區見唔到囉!圖中就係日式亭閣與荒草地!大家知唔知其實東京都係有 上野、中野、下野三地,佢地其實都係附近,昔日上野係當時江戶貴族的地方,而中野屬於中層人士的居住地,而上野就是當時的平民窮民住的地方!那你們應該明白當時江戶的分佈了!也亦估到其他區域的起源or中心地位是怎樣來的!再唔知就打開日本東京地圖看看啦!我不多說了!(我唔想讀歷史地理悶死大家!比個概念大家就夠了!) 另一幅就是熊貓!haha~~唔好問我佢點解會出現!我都答你唔到!我只係知道上野有個上野動物園,可能係咁既關係啦! 之後就到矮柱仔啦!全部都係上野的阿美橫町的尾段 (即近yamashiroya那一段內)將日本本州的縣刻畫出來作街道裝飾,一來可以美化,二來可以讓遊客觀賞,仲有可以比d小朋友學本國地理,都幾唔錯呀!而每一個縣都有佢既特色係度ga!下圖係青森縣~ 這是岩手縣! 還有秋田縣~ 仲有宮城縣~~ 同埋山形縣等~~ 我就冇影哂,只影左一部分!有些港澳人會比較陌生,因為大部分都係日本的東北數縣來的!有好多時見d旅行團有日本東北,就係指呢一堆啦!位於本州上半部分,再上就為北海道。如果有你搭JR 東京-->札幌的話,一定會經過呢幾個縣! (待續:番外篇の行程記敘Video)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(18) – 台場玩樂購物行Part 5

Mega Web --> Palette Town --> Aqua City --> Meidage 一入到去,見到好多夾公仔機同波子機呀! 當然亦有好多街機啦!又有Bio hazard既槍擊game,仲有好多大家都見過既~~ 同時亦見到好多大朋友係度玩d賭馬機囉! 又見到一隻3D立體休驗的假過山車game~~我之前已經試過,真係好假囉~~不過就arm我呢d好驚離心力的人玩呀! 又同阿K小姐佢地玩呢個,最後梗係我win左啦~~hahahaha~ 大家又走左去玩筋肉擂台既9格藍球、9格足球,我地仲挑戰9格棒球,唔知係咪我地全部人都唔識打棒球,所以我地冇一個人個波係接觸到個框囉! 係遊戲機中心內,最好既就係同港澳的好不同,絕對沒有煙霧迷漫,係日本既所有遊戲機中心,都好光猛,空氣好清新,真係適合一家人去玩既地方!再看看裡面有幾多野飲呀~~睇到你眼花花,唔知揀乜野飲好tim~~ 玩完哂,出返黎,見到有一間design showcase,不過冇時間就冇去到啦! 我地就好快咁搭返百合海鷗去返台場海濱公園站,我地要去Sony展館 同 coka-cola專門店呀!去到Aqua city都已經4:30左右啦~~我地就好快咁入去,因為我地要去Mediage的Sony展館,體驗最新的科技呀!不過場內不准攝錄,如果唔係我就影多d相返來比大家看看啦! 係Sony展館有好多新科技,包括視覺殘影、自由轉動、電腦識別、輕觸感應......好多好多得意野玩!之後就去左coka-cola專門店~~看看下圖,這就是入口啦~~裡面有齊各式各樣的可樂精品呀! 看看裡面的陳設及售賣品,真係好多品種,但價錢一樣好貴!所以我冇買野~~ 好快咁就出左黎門口影下相,睇下Qoo d攪笑廣告仲好啦! 等大家都睇完coka-cola啦~~之後就去返Aqua City,而阿N小姐同C先生就一定要來Snoopy Town 以及Sanrio,因為佢地要買野送比人呀!至於我呢,就冇興趣,因為我覺得澳門香港都有得買,唔駛特登係日本搬返澳門啦~~ (待續:台場美景)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(13) – Day2 晚餐 京風百花日式燒餅

上回講到去新宿閒逛,而且預告左我地係新宿的晚餐,但留待今篇才說!無非都係想同大家解構一下呢一餐既做法食法,因為需要詳盡解釋呀!大家有心理準備未呢? 大家睇到上、下兩幅圖有d乜野感覺呢?去過日本既人應該都知,我地今餐係食日本出名的日式燒餅。其實日式燒餅的發源地是關西地區的,之後慢慢風行全國,更開設了多間連鎖店! 現在各日本地區都可以品嘗道地的日式燒餅~~如果大家有睇日劇的話,應該都有d印象!乜印象?就係order d燒餅,之後係自己燒自已食,店員係唔會幫你整ge! 我地一入到呢間 "京風百花日式燒餅",我地就坐左一張6人檯,而且仲唔駛盤腳而坐,非常好~~否則死硬~~跟住落黎就係餐牌啦!原來呢一間冇英文 或 中文餐牌ga~~對於大家都唔識日文的關係,叫菜、點菜、詢問意見等等就落在我這個 "假冒日本人" 身上啦!咁我就梗係叫左四份大size燒餅啦!分別係:海鮮大盛、牛肉大盛、豬肉大盛、雞肉大盛 四款,適合各人的口味,唔駛爭囉!之後我又問佢地叫什麼飲品(因為此店規定每日都要叫一杯飲品),當然我又係要做翻譯啦~~我話款款都係150yen,有可樂、橙汁、雪碧囉~~另外有青檸梳打、青蘋果梳打、哈密瓜梳打,及一些麒麟啤、一番啤咁囉! 最後佢地都係揀左可樂、橙汁呢d大路野,而我就揀青蘋果梳打,因為未飲過丫嘛~~當然佢係有少少酒精成分啦~~全部飲品都係一枝枝來的~~個個都試左我既青蘋果梳打,都話好唔錯囉!所以都話早知叫呢枝啦!haha~~ 出完飲品,我地既海鮮大盛材料出來啦~~由於我2年冇玩過,所以店員就教我地整。首先將海鮮同d燒餅醬溝埋,打至糊狀,如下圖~~ 然之後就倒哂落鐵板度(如下圖),但唔可以太薄,因為一陣玩雜伎---翻餅既時候唔夠力翻唔到ga!厚厚地就arm ga啦!之後就靜心等候~~等....等....等.... 終於有得翻啦~~我好驚失敗呀~~因為會攪到成身就係ga~~好彩~~成功左~~haha~~~此時另外兩份(雞肉 同 牛肉)都來了,而豬肉就去左隔離個鐵板~~由L小姐 同 C先生負責~~我地四個人負責3份~~ 第二份落板啦~~睇下我同阿N小姐埋頭苦幹係度攪個新餅~~haha~~(見唔見右邊的檯上我杯青蘋果梳打呀!hehe) haha~~我地第一個餅完成啦~~最後仲有一d步驟,我地由調味總廚 N小姐 同 K小姐負責~~首先在調味架上將特製醬油平均掃在餅上,之後灑上紫菜碎,最後落柴魚乾(即係taco燒上面果d淺棕色既野),整個製作過程就完成啦!yeah~~ 由N小姐進行分屍儀式,一開六,haha~~有得食啦! 呢幅就係由K小姐為大家分配食物~~haha~~ 看看~~我又掛住食啦~~好彩今次捕捉到鏡頭o者~~(因為我太肚餓啦~~hehe) 評語時間:『海鮮大盛』-- 分數:9分 (好鮮味,而且我果份有帶子~~yeah~)『豬肉大盛』-- 分數:7分 (d豬肉有少少唔熟,我好驚發豬瘟呀~~味道一般~)『雞肉大盛』-- 分數:7分 (同豬肉差唔多味,食唔出係雞肉囉~~)『牛肉大盛』-- 分數:8分 (剛剛熟既牛肉碎,非常不錯呀!yeah)其實日式燒餅同燒墨魚丸(我叫Taco燒)係差唔多味,只要你落醬油唔好咁重好,就好好味,而且唔會太鹹,最好就煎熟少少,否則d肉仲係生ga~~ 全部合計埋單:6930Yen (每位 1155Yen) 約澳門幣$77.4,算係抵ga啦~~係日本來說~~咁當然唔好用連鎖快餐去比啦~~ 咁我地食完就再繼續係 新宿閒逛 行啦~~ (待續:day3台場玩樂購物行)詳盡相片資料及其他沒貼文的相片於 內。編/攝:阿乃另攝:K小姐、C先生 本 著作 係採用 創用...

《06’真夏東京》(22) -山手線巡禮之決戰上野Part2

係上野廣小路口站的阿美橫丁行完,又食完中午飯,咁我地就繼續係上野度行啦!雖然大家已經係淺草、阿美橫丁買左好多野,亦鎖哂係上野駅的大型Locker度! 呢度係上野駅對面阿美橫丁尾段的一間食肆,好靚呀!忍唔住要影佢相!鬧市中竟然有一間古式園林屋~~真係好有韻味~~ 呢度係阿美橫丁的尾段,好近上野駅的! 呢間係o係我地食午飯既對面,又係食日本料理的!不過個look好似好殘囉~~ 又行左一陣之後,見到同之前的阿美橫丁前段差不多,所以就走返去上野駅對面,果間我成日講,好大型既Yamashiroya,它是一棟七層高的玩具、食玩、模型、公仔、潮流玩意......的玩具店! 你看看佢個門口,而家唔知又sell緊d乜野新卡通啦~~ 一入去就有keroro超大公仔歡迎你~~真係爆笑呀~~ 門口仲有好多新野同簡介每層的商品呀~~ 仲有麵粉公仔同d小食玩呀~~好似真既咁囉! 好啦~~講左咁耐我地不如入去店裡面睇睇,日本有d乜野新產品啦!Let's go! 通常門口都係擺放一d新發賣的產品ga!好似圖中的發光鴨仔、中層的沖涼發光波波,仲有一d浮既甲蟲~~ 呢一邊就有可以係房間天花投影做出星空效果的機器!又有我04年已經係度買左既天花投射北極光燈~又有音樂節奏魚(同iDog同一原理),又有d正方形變色磁石燈~~仲有iDog呀~~(其實呢d野,係香港既city super已經引入左!) 跟住就係暫時只在日本發售的養人仔機,拼埋多部仲可以探鄰居tim~~一買就要買2個,而且要成19000yen呀! 呢部就係我好鍾意,得返一部,但我最後都係冇賣到既野!佢係一部月亮投影機,佢可以將月亮投射在天花板或牆上,只需半小時佢就可以由東行到西,仲有埋由新月至月圓,再到新月的整個過程!攪到我勁心郁想買! 呢個就係今期大熱既keroro專櫃,展示左好多新產品供大家購買呀! 呢個應該大家唔會陌生ga啦!佢係搖頭公仔~~不過今次係新顏色、新表情,仲有香味tim~~而且係代表幸福、戀愛、財運同健康ga~~ 而呢隻又係新野,係一隻音樂熊呀~~可以幫你keep住個電話,響既時候佢會唱歌話你聽呀~~不過都幾貴,唔平呀~~ 睇完哂玩具,我都有賣一d食玩扭蛋!大家都有少少收獲啦~~攪掂哂d野就已經成4點半啦~~咁我地就要好快咁去銀座!之後shopping既戰利品就放係locker先啦~~因為最後要返黎上野駅轉山手線返池袋呀!(待續:山手線巡禮之時尚銀座)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(19) – 台場玩樂購物行Part 6

台場夜景 --> 回池袋 上回講到,我地去完sony、cokacola、Aqua city之後,成6點半啦!就快快咁走去台場海濱公園set腳架攝靚相啦! (回影富士電視台、Aqua City) (呢張係一柱擎天呀!) (台場海濱公園的上層藝術迴廊!) (台場海濱公園上層休憩區!) (彩虹橋!開始天黑啦~~yeah) (以闊景圖拍攝的台場彩虹橋呀!) (台場海濱公園的自由女神像!我覺得呢張好有藝術性~~)(換左角度,影左呢張就係入夜後的台場彩虹橋+東京鐵塔~~so nice)(呢一張就係我地回池袋既時候,快速咁影左一張個摩天輪呀!有少少震左) (待續:山手線巡禮之重遊淺草)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(23) – 東京都巡禮之時尚銀座

係上野行完,好快咁就黎左銀座! 好例牌咁都要係和光鐘塔呢個銀座地標度影返幅相先得ga! 呢間就係地鐵站出口的鳩居堂啦!好似係好出名ga~~不過唔記得左係點啦! 嘩~~日本國的麒麟啤,不斷咁賣緊廣告呀! 影左一陣相,阿K小姐、N小姐同C先生就畀間Adidas Orginal Shop吸引住入左去,行左近半小時呀!之後我就要過去隔離果間Uniqlo度買野,因為我知道呢間係最大最齊同最多新貨既東京Uniqlo店呀~~我一直都話要去掃衫,咁我又點會錯失呢? 我係裡面買左好多衫同褲,近20000yen左右呀!用左4個字,冇錯因為時間緊迫,只有4個字時間,我都已經兩大袋出返來,應該係一睇arm,價錢OK就立即拎起比錢啦!而S小姐、K小姐都有一齊入去買野,都有斬獲呀! 之後又影下d名店先!早前係新暫影左幾間,現在我影埋PRADA、GUCCI! 之後阿K小姐話要幫人買Fancl,咁我地就入左呢間樓高8層的Fancl啦!佢地都有買野出來啦~~ 跟住出到來已經成6點啦~~天都開始黑,而且有少少微雨tim~~不過我都冇理,照影銀座的Shiseido店門面囉! 之後就要入去Burberry,因為阿K小姐上次係台場冇買,要來呢間買,我又要幫個friends買一個佢指定既手袋囉!最後我好快就買左,而阿S小姐同L小姐都忍唔住名牌的誘惑,失手買左個袋!d職員好叻咁幫我地包裝、入袋,仲加多一個透明膠袋笠住防雨水,真係果然係名店,服務係唔同d! 買完都已經為7點3左右啦~~L小姐一定要去地鐵站附近既不二家買糖、餅做手信!而我就因為太肚餓,就係不二家買左一個班戟千層蛋糕食,頂住個肚先!就在那時,昨晚台場返到池袋已經係8點,N小姐去唔到Sanrio,今天N小姐無論如何都要去,所以就一直咁催我地走!(但我地成日都話日日住池袋,你幾時去都得,而且我地plan左最後一日去呀!)但佢就一定要去左先,所以我地個個都係度趕!我承認我當時係嬲ga~~因為我未試過係街度冇哂儀態咁以9秒既速度食完一件蛋糕,仲要係有忌廉既,食都成嘴都係cream,仲要面壁食(唔想比人見到我咁狼狽,因為地鐵唔比食野!),最後真係呢咁hea囉! 之後返到上野駅,N小姐同C先生一拎返d野,我地就叫佢行先,唔駛等我地!我地就慢慢咁先返池袋!因為大家都拎得太多野!梗係要慢慢行啦~~而Sanrio,佢地都明白最後一day都會去,唔急既~~ (待續:瘋狂後遺症)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(17) – 台場玩樂購物行Part 4

Venus Forts --> MegaWeb 早上來了台場,去了富電視台,又去了Venus Forts,食埋午飯,終於到了我最想看的車啦~~其實我已經係第二次來 MegaWeb了,第一次我冇玩果個e-ride,亦冇影太多相,所以今次要玩返夠影返夠本先!haha 其實Megaweb 係Toyota  City Showcase,即是說以toyota為主囉! 看!都係門口留影呀!(我左邊多左一個黑色袋,果袋係Venus Fort既戰利品呀!hehe~~) 一進門,就見好多車啦,呢度係其中兩輛~~ 呢輛車我覺得好靚ga~~好似係2006年的新車黎ga! 我來呢度最開心,原因係所以車都比你任坐任影,大大話話都有成50幾60輛車ga! 當然有in,亦有古老d既款式啦!我都試左好多部車,亦影左好多相~~haha~~ well~~試呢部車就好似突然變左個有錢仔咁啦~~好靚呀~~同時亦都好名貴~~如果唔駛錢就有,你話幾好呢! 呢部係細車仔,都好得ga!不過坐落去就好似低坐落去咁,所以我不太欣賞! 呢部係另一部七人車,我叫K小姐幫我拍下照囉! 呢個係動感影院,唔駛錢就有得玩,排一兩分鐘,就有得玩啦!不過佢比其他d動感影院都差,唔夠激囉! 玩完之後,佢地就去排左呢個真實F1模擬賽車,又係唔駛錢~~不過佢地就排左幾個字先有得玩! 而我同阿K小姐就去左畀錢玩電動車(E-com RIDE),它是一部電動化汽車,佢會自己駕駛的車,旨在被你感受下,佢自動駕駛的感覺!原理就係條路有特製的部件,只要部車又有相關零件,咁佢地就可以智能便別,包括提速、減速、轉波等 呢個就係我地去住e-car既果個站 (都市陳列館1樓站),因為佢有幾個站台ga! 嘩~~你睇下有幾多款,不過唔係你揀ga!黎到係邊部就邊部~~不過我果部都好靚,係灰黑色ga~~(同我自己jar緊部車係同色~haha)由於仲有人係後面排隊,我費事阻住人就冇影到ga車! 呢張係話比你聽條路線點行,會有d乜野特別,以及景色會怎樣的解說圖! 已經入左車廂內啦!我地係8號車~~haha 有好多不同的按鈕,都唔可以亂按呀~~ 你看看,只係行15km/h 咋,好慢~~但可以看清楚周圍既風景囉! 呢張就係坐e-car時係摩天輪底經過時影既~~我好鍾意呢一幅相呀! 之後就出返來係一部展示品的e-car度影相~~ 如果呢部車可以快d投入市面就好啦~~只需用電,唔需要石油氣、氣油咁樣,就唔會有咁多空氣污染啦! 呢部係試乘預約機,可以預訂想試jar的車及時間,好方便ga!而且都係一d新車種~~ 另外一邊的車輛性能及資料介紹呀! 這是二樓的概念車陳列區! 呢d都係概念車來的! 去了Megaweb,玩左2個鐘,之後有天空下起少少雨,我地去左Palette Town玩筋肉擂台同夾公仔機呀! (待續)詳盡相片資料及其他沒貼文的相片於 內。編/攝:阿乃另攝:K小姐 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(33) – 東京迪士尼海洋(五週年首日) Part II 地中海港灣

終於買完票,正式進入Disney Sea既入口啦!由於係五週年慶典首日,所有入場人士獲得紀念品一份!yeah~~ 一入到場,先有一個大大廣場,廣場有一個大噴水池,水池中間有一個大地球,haha(唔好誤會我去左大阪既環球影城呀!)不過就真係好似好似環球影城果個地球囉!只係冇左個名之嘛! 五週年就係水池邊加左一d靚靚雕塑做裝飾囉! 呢個就係迪士尼果個站呀!上一篇講過ga啦! close up個大地球比大家睇! 影完相,大家就準備正式進入迪士尼海洋囉!(你睇下!都唔少人ga~~) 呢個就係正式進入迪士尼海洋第一個區的入口啦! 入左去影返出黎!好古典的感覺,冇記錯既話係屬維多利亞式的宮廷建築風格!呢一區係入迪士尼海洋必經的首區,叫地中海港灣,(就好似迪士尼樂園果邊既美國大街咁!一定會經過~) 看看周圍的風格估唔估到係邊度既建築特色呢? 再close up比你地睇睇,估唔估到? 估唔到呀?咁我開估啦!係南歐風格的民房建築,主要以高聳、窗長,一棟棟緊貼於一起,給人壓迫的感覺呀!(代表地有:意大利的那不勒斯海灣),之後再配以意大利各處的休閒騎樓及cafe的地下層,好特別!果然係地下海港灣,取材非常貼近呀! 之後繼續企係入口處附近影相,點解?因為仲有唔夠10分鐘就會上影5週年先有既第一個show---里多島歡聚與笑顏,歷時25分鐘ga!所以個個都不急於玩game,企哂係度等!(仲有每日只係得10:00am一場 咋!) 呢個對地中海港灣面向的火山,晚上做show時會噴火ga!(絕對比澳門漁人碼頭果個勁~~) 呢d就係海灣邊的破爛之屋,好有特別,勁似古羅馬時代的遺址囉!haha~~ 呢幅就係我地霸到既海邊位影相! 再來一張zoom埋去影個火山同里多島~ 我地霸到靚位睇show呀~~個show正正十點就開始啦!隻船都係5週年~~上面企哂大部分迪士尼既經典人物(之後你唔會再見ga啦!因為佢地要返去迪士尼樂園果邊,此終海洋呢邊唔係佢地既地頭,老鼠邊識遊水ga?都係畀返小魚仙、海底奇兵、高飛、唐老鴨佢地jar fit啦) 嘩~~你睇下距離我幾近~~我影得好清楚呀!仲見到松鼠仔、唐老鴨女朋友(唔知係咪已經係老婆呢?)haha~~ 之後仲落頭同大家打招呼tim~~不過唔好意思!我冇理到佢地就立即飛奔去搭船入失落河三角洲,因為要玩2個game,同11點睇第二個show,haha~~我set得好密ga,如果唔係睇唔哂! 行過去碼頭的途中...... 呢度係行去搭船既途中有一座好天文台feel既可建築~~係郵局來的! 又一幅藝術性好高既相~~10分~~ 呢隻就係我地將要搭的跨區渡輪啦! 其實係迪士尼海洋,除左度度都係5週年既logo之外,亦花左好多心思係d週邊配件果度ga!最吸引我既就係旗幟呀!因為每一個區域都有配合該區唔同特色的旗幟,而且顏色、形狀、花紋都完全唔同ga!大家看看以下的一部分先啦! 入口廣場的旗幟!(以星星燈 配 棗紅色長方形旗) 地中海港灣的旗幟!(以綠色圓筒形+金色旗仔,古典式街燈)(待續:東京迪士尼海洋(五週年首日) Part III)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(29) – 原宿~竹下通

食完個午飯,我地就開始分開行竹下通啦!因為大家的重點不同!我地分開2組,一組係N小姐+C先生一對couple。另一組就係S小姐、K小姐、L小姐同我! 下圖就係竹下通的入口牌坊,有M記ga~~好易認,係正JR山手線原宿站出口對面! 呢度都有一間Daiso,當然我地唔會入去浪費時間啦~~澳門都有駛乜入去呢!佢地女仔睇左好多衫、裙、帽、香水......我都係只有陪的份!因為前後男裝較少,就算有都係d HIP POP裝,完全唔arm我style~~ 之後佢地話 "爸爸" 平呀!就入左去最大間既 "爸爸"店度買,此時couple都行到黎,又入埋去,我就坐係鋪頭出面既木椅等佢地,我等左成個鐘啦~~又曬又熱!真係想死呀!又話好快得~~攪到我驚佢地走失,原來係度揀來揀去!好彩佢地最後都買到,如果唔係,我一定 #$^#$(*%(! 佢地。 之後我地咪繼續向前行,有男裝arm心水既店舖我都會入去睇,佢地亦都會去睇女裝囉!正當我地就到盡頭既時候,阿L小姐仲未找到那間買大眼妹既店舖,我地咪一齊幫手搵囉!搵到之後,佢地個個都上哂去睇!剩返我同S小姐係樓下等! 就係呢個時候係一間男裝鋪頭巧遇F4的Vanness呀!真人真係好大隻,一眼就已經望到係佢,佢身邊有2個助手跟住,而且佢應該係休息時間,見到佢,我d朋友梗係想同佢影相啦!專登係門口等佢,初時佢助手係門口等,之後佢聽到我地係度講,又係門口等,佢2位助手就入左去店內跟住佢,佢可能以為我地佢carzy fans掛,之後睇左好耐男裝衫就出來了,但最後佢助手唔比我地影,所以影唔到囉!講真,佢真人同上鏡差唔多!(佢果時已經同安七炫組左隊ga啦!) 之後佢地影唔到就梗係有少少失望啦!不過人地係明星,黎行街梗係唔想比d fans纏住ga啦!藝人都係人,都有自由既私人空間,對吧! 我地走出竹下通的表參道附近出口,準備向表參道進發啦! (待續:原宿 - 表參道、南青山)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

《06’真夏東京》(39) – 東京迪士尼海洋 Part VIII 發現港&美國海濱

係神秘島玩完野,我地就快快去發現港玩啦!因為呢區所以既game都arm我玩!haha~~一去到呢區,我地梗係影左相先ga啦! 呢個係從神秘島去到發現港的第一個建築,好鋼鐵工業feel囉!有少少好似去左 FFX的世界咁,好科技,但又好老土! 火柴人係發現港標誌留影呀!大家快d走呀~~小心著火 好有特色的類歌德屋頂! 坐左樓梯落黎既一幅~~haha~~ 呢幅我好like ga!我覺得好美的天! 發現港的公共設施---chair & 雨擋! 另一款chair & 雨擋~~ 之後就入左發現港間紀念品shop(下圖),我買左一個龍捲風製作器,好得意!又可以當紙鎮,好唔錯ga!得閒搖下佢又會出現龍捲風~~haha~~ 睇完shop,我地就去排發現港既重點遊戲----風暴騎士,佢勁多人排隊呀!我地排左差不多半小時以上先可以入去玩!不過就真係幾好玩囉!類似動感影院咁,而且仲係4D,即係有噴煙、香味、灑水ga!我都比佢淋到濕哂!(因為講我地跌左落水!)我比佢兜口兜面咁噴,好在我有條毛巾咋! 之後都濕開頭!我地再去玩水上逗趣船,原來佢有分濕身版同非濕身版ga!我地揀左非濕囉!而N小姐同C生就揀錯左濕身版!不過係睇下你架船好唔好運!(因為唔係架架都濕!)排隊時我睇住一架船直衝入瀑布!爽呀~~全濕! 這是橫過發現港的列車,我地冇搭呀!因為太多人排隊呀! 係呢度既高飛機械狗雕塑! 玩完哂發現港就走去"美國海濱"!這個亦都係迪士尼海洋既最後一個區啦!我地去到美國海濱既時候,個天越來越陰,我地趕去睇個show,點知佢落起雨,而且越落越大,所以既show都停止哂!結果,美國海濱就只係冒雨逛逛!而阿K小姐諗佢玩既 "驚魂鐘塔",原來未開,因為我地7月去,佢9月先開呀!所以......失望! 驚魂鐘塔 及 美國海濱的旗幟~~ 呢隻係美國海濱的特色郵輪,只係建築物,唔會開航ga! 發現港的旗幟!(好工業時代的媒油燈feel) (待續:東京迪士尼海洋(五週年首日) Part IX)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

向東京出發2006: 在日記事手稿

各位: 咁遲先update真係唔好意思,因為晚晚都好夜返來(有時成12點左右,但成3點先有得sleep),第二日好早起身(如7點、8點,最遲都係9點就要出去)。 今日我先有機會用酒店的免費上網電腦~~haha~~why?因為今日早返,明天要去迪士尼呀!如果之前有回應blog文的話,大家可以去check下啦~~我已經回覆左你地啦!再者,酒店部腦打唔到中文,所以我今日攪左好耐先打到中文呀!今天就等我一口氣將第一日至第四日的特別事簡單咁講比大家聽啦!不過相就欠奉,因為部腦冇得插card or usb.(返來先貼相比大家睇啦) Day 1  陰、雨其實冇乜特別,就是3:00am出去碼頭搭船過香港,之後搭機鐵去機場,而且我逛到生平第一次係香港睇日出,真係唔錯呀!之後就搭飛機囉!起飛時就下好大雨,而且雲層好厚,又要經過台灣海域上的颱風,所以成程就係咁拗到七彩,而我係好驚離心力既人,所以全程都好緊張!到了成田機場係delay左一個鐘了,又要趕去搭京成線,真係想死!去到池袋的酒店已經係晚上7點鐘,攪到8點左右先食飯,飯後行左一陣,去左夾下公仔,之後就回酒店! Day2   陰、晴第二日去左橫濱的山下公園、冰川丸同中華街,終於有返少少陽光啦!之後就去了新宿shopping,到夜晚先返池袋! Day3   晴、陰第三天到了台場,行了好多地方亦影下不少相片,(如:富士電視台、Venus Fort、Mega Web、Aqua City、Mediage、台場海濱公園......)傳聞話Venus Fort係女士的大商場,只有女裝,一入之下,原來有買男裝的店都好多,亦由於7月係Big sale大日子,佢的商店有好多有折,有d低至半價,我買了好多件衫呀!之後又去了Mega Web睇車,亦影了唔少相呀~~之後去了台場海濱果邊睇sony sinence Explorer參觀,又去左cocacola睇野,去圭其他之後就去了影rainbow bridge.之後就返左池袋啦! Day4  晴、陰、雨第四天一早就去了淺草睇神社,可惜有一部分裝修緊,之後就係仲世見通買左好多手信。跟住就去上野shopping,只用了短短4小時左右,6人總共買了超過40個大袋的東西,有的朋友仲要立即買個行李箱裝先行得到,你話誇唔誇張呀!(因為我帶佢地去既都係好平好正既購物點,絕對不是團去的名掠水貴價店,所以個個滿載而歸囉!)之後再去下一站銀座之前,需要係上野開4個大Locker先裝得哂D野,之後到銀座再Shop過!最後又要池袋,回酒店時6人總數係超過50袋野~~(遲d詳細請既時候你就知~~絕對係傳奇性的一日,挑戰哂人類既耐力、體力、臂力同腳骨力) Day 5 晴、陰、雨今天第一站去了原宿的明治神宮,求左平安符,亦影左好多相。之後係原宿的竹下通開始,一直掃落去表參道到南青山。(總共行了約5個半鐘啦)期間有一件事特別事,就係臨離開竹下通時,係一間鋪頭巧遇F4的Vanness呀!真人真係好大隻,一眼就已經望到係佢,佢身邊有2個助手跟住,而且佢應該係休息時間,見到佢,我d朋友梗係想同佢影相啦!專登係門口等佢,初時佢助手係門口等,之後佢聽到我地係度講,又係門口等,佢2位助手就入左去店內跟住佢,佢可能以為我地佢carzy fans掛,之後睇左好耐男裝衫就出來了,但最後佢助手唔比我地影,所以影唔到囉!傍晚大家去了六本木,天開始落雨,而且越落越大tim~~再者朋友經過昨日一Day的體力勞動,個個都變得容易發脾氣又唔想行,所以我冇勉強佢地,事關係我想去睇展覽同影下六本木d相,大家可以唔跟既~~佢地話好累,所以佢地一開始就坐係information門口,而我自己以探路為名就去了影左好多相,跟住先會合佢地先再上博物館同city view floor~~最後又回到池袋啦! 總結5日來,買左好多野又食左好多,但係有好多地方因為我地行得慢,睇得慢的關係,而刪除了一兩個地點冇去(東京皇苑、澀谷、秋葉原),其實我都去過,所以冇乜所謂~~hehe~~加上大家原來like shopping多過睇景,只有我一個like睇景同take photo,所以我都冇謂強人所難,cut咁一點行程,比多d時間大家買野囉! 好啦~~唔講住啦!明天要早起去迪士尼,所以現在要上房bath & sleep~~明天再傾! 編:阿乃(日本時間  2006‧7‧13   11:25pm)

《06’真夏東京》(37) – 東京迪士尼海洋 Part VI 午餐(於美人魚礁湖內)

我地係美人魚內食午飯!下圖呢隻應該係K小姐影既!d像素好差呀~~ 呢度係餐廳環境!其實都幾唔錯ga!野食既價錢可以接受ga!唔會太貴! 呢個係L小姐自己既一個迪士尼海洋5週年套餐,全個迪士尼海洋都一樣ga啦!只不過個包,每一個區都不同!呢度係蚌造型的包,加薯條、汽水同一個波子汽水味啫喱! 而我地(K小姐、S小姐同我)三個就叫左一個大蚌包、一個PIZZA、一個魚柳、一個薯條,同3杯汽水做中午飯! 其實就唔多夠食ga啦!不過佢地唔係點食野,咁我就食左近8成,haha~~我夠飽啦! (待續:東京迪士尼海洋(五週年首日) Part VII)詳盡相片資料及其他沒貼文的相片於 內。編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  
- Advertisement -
Macau, MO
多云
24 ° C
24 °
24 °
78 %
5.1kmh
40 %
週日
25 °
週一
23 °
週二
24 °
週三
24 °
週四
23 °

社交網絡

10,061粉絲Like
1,076追隨者Follow
9,396追隨者Follow
35追隨者Follow
25追隨者Follow
1,096用戶訂閱

最人氣文章