24.1 C
Macau
星期三, 三月 20, 2019

2004關西東之旅 (11)—體驗橫濱番外:MM21的夜景篇

下一章講到橫濱的MM21,今回番外篇貼上一輯由橫濱地標塔拍下的橫濱夜景,讓大家一同來感受下夜幕下的新橫濱的魅力! (Zoom近左海風遊樂場的大摩天輪) (下兩張是橫濱NTT分壇及空地,夜晚果然可以hide哂d空地,好靚呀!) (另一邊的夜景,向東京的方向呀!) (下兩張另一邊的夜景,有海上陸橋呀!) (下三張都係海風遊樂場及旁邊似杜拜帆船酒店咁既建築物) 大家覺得怎樣呢?日暗與夜景是否分別很大呢?我當然覺得夜間簡直是~~~美呆了!haha~~雖然是新的區域,但它絕對係好靚既新型城市。如果想睇真d的話去相簿度睇啦! 這批相其實只是一部分,仲有10張左右沒有貼上來,原因是差不多一樣的,相簿裡會多幾張。另外就是上面d夜景相係我個friends影既,唔係我影,係用數碼專業相機+腳架,仲使用了慢快門拍攝才有第一張的效果!(其實有好多人都影左一D差不多同上面一樣既角度及感覺既相出來ga!)編:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (13)—後記

終於寫完了屬於日本的第二部遊記啦!真係寫到我死死下,好在有d資料同之前旅程mark低既重點係度!如果唔係都幾難寫得到出來!當然d相都幫我唔少!打這個關西東之旅其實係咁多個最吃力,因為寫到中途就因為忙及趕工加拿大的遊記,而丟低左日本遊記好耐,令好多本blog的訂閱者走左唔少~~haha~~不過今日終於完成這部遊記了!太好啦大家可以比返d回應我,等我下次再寫好d ga! 預告篇:這個第二部日本遊記就寫完啦,黎緊既第三、第四部的日本遊記都要加快趕工,分別是:第三部日本遊記:《05' Expo 名古屋『愛‧地球博』紀行》主要記敘上一年去名古屋參觀5年一度的《世界博覽會》,本次主題為《愛‧地球博》,有好多日本的新科技及世界各地展館,我會在遊記中介紹整個博覽會,雖然係遲左成年,但都記憶猶新,希望各位會鍾意啦! 第四部日本遊記:《九州2001 回憶相集》主要係scan返d相上來,回憶返01年去九州玩的情況,因為年代久遠,已經有好多野唔記得,所以係以相為主。 另外亦以敲定本年7月9日飛去日本旅遊一星期,到時返來又會有第五部遊記的出現!hehe~~同時亦會提供更多日本的新資訊、日本人習俗及遊日禮儀法則等~~希望各位可以繼續捧場啦! 而各位捧場既《新加坡遊記》就要等等,我承諾各位等我寫完『愛‧地球博』就立即提速寫起佢!不便之處,敬請原諒! 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (3)—關西京都

DAY 2   2004‧8‧16  (關西)大阪-->京都 (金閣寺、平安神宮、清水寺.....、京都火祭)-->大阪 一大清早就起床吃一頓豐盛日西式早餐後從大阪出發去京都,當然選坐新幹線啦!需時約一個半小時就到京都了,各人兩話不說就爭取時間在車上休息。我基本上都唔會sleep,因為要留意幾時下車嘛!所以就聽下歌囉! 到了京都駅之後,第一時間梗係去站內的觀光案內詢問行程路線、拎地圖、問火祭的時間及最佳路線等有關資訊。唔講你唔知,其實一些JR大站內都有觀光案內所供自助遊的遊客查詢及購買當地有關門票、一日遊巴士票、免費地圖及資料等,而且京都駅觀光案內係有識講國語的日本職員tim,所以好快就可以完成查詢,走出來自己plan景點次序,以及確定巴士番號啦! 有一樣野,大家都應該知,日本是一個守時的民族,不論人、JR、地鐵,原來連巴士都一樣準時,而且巴士站的電子牌會有提示幾號巴士還有幾個站就到在下的巴士站,真是先進到不得了。 我們首站去金閣寺先,它是金漆外牆,金光閃閃,倒影在湖上,尤其漂亮,成為謀殺菲林的要點。而且寺範圍內還有好多地方遊覽,白蛇洞等。最後還吃了一個大雪糕tim~~haha~~ 之後我地去第二站的平安神宮,這是京都最著名的神宮之一,因為京都已往是首都,而平安神宮更是首都重要建築物,掌管整個東瀛的命脈,由當時的陰陽師、國師主理,為天皇占卜吉凶等事情。而建築風格以中國唐朝庭園風格為主,加入風水陰陽的佈局擺設,於前院設有左青龍及右白虎的清泉,現在已經成為遊人必到之地,清泉更相傳飲用後能治百病、健康長壽呀!    當然最後在平安神宮內殿前黎過大合照tim啦!(本人用了油畫效果,以免朋友的樣子曝光,haha~~不過他們來看我個blog的話,實睇到邊度係自己啦!)至於我呢,就是"左3" 站立的雞翼袖啦! 之後要吃過午飯後再去其他地方,又在平安神宮附近閒逛了一下,見到好多日本人著住傳統和服在街上走,原因是當晚是大文字火祭,日本人一逢有祭典就會穿和服,而且街上亦有古時的人拉車供遊人乘坐ga! 及後我地出發去第三站的清水寺,港澳人不會不知的,因為我地去既呢三個景點都係好出名既!而清水寺出名在於它歷史悠久,而清水寺的空中舞台更以全木建築,不落一根釘,非常罕見。 另外又有地主神社在旁,一走上去就發現很多小小的神壇及有顆岩石在地上,而全部都是祈求愛情的。而地上的兩顆叫戀愛占卜之石,相傳戀人矇眼於兩石向前行,如果能相遇就可以白頭到老;而未有戀人的單身人士,只有在任一戀愛石矇眼向前走如撞到異性又或是去到對面的戀愛石又找到的話,戀愛就好快到來啦!(不過信不信由你,而且因為係旅遊點,人太多,撞到人都好易姐。) 最後到樓下非常著名的泉水瀑布果度(正確名字唔記得lu),排隊入泉水,為什麼?這個泉出名在於它的三個泉眼,相傳能帶給人健康、金錢、愛情(由右至左),所以好多人都慕名而來,而我地當然係好貪心,一次裝埋三個泉眼的泉水。(偷偷告訴你們,我還帶了個膠樽裝水呀!haha~~) 不過其實冇乜特別,只不過係特別清涼,在炎炎夏日都係一個解暑好辦法,你睇下相中,幾多人係度排隊,我就已經飲左啦,你地都去裝返d健康、金錢、愛情返來啦! 遊玩完景點,梗係要係清水寺門前的商店街行下啦!有好多紀念品、日本傳統工藝、和菓子......應有盡有,一行就行左成個幾兩個鐘。(我們都是購物者嘛,一兩小時好閒姐) 六點鐘左右已經開始多人,有人食飯,有人現在先到京都,有人開始去各公園霸位睇火祭,道路上的車擠塞得好跨張,而等左好久都上唔到車,路又窄,而人不斷增多,而我們亦考慮回程時的情況,以及JR回大阪的班次,所以決定不參與火祭,而需直接回大阪,如果唔係,好可能要係京都街頭過夜tim呀! 回到大阪已經成9點半了,雖然大伙兒有點兒失望,睇唔到火祭,但也慶幸可以回到大阪,而且都已經好夜,如果睇埋的話,分分中冇JR返黎tim。之後到酒店附近的松屋吃過晚飯,又去了便利店買少少野就回酒店開會及沖涼睡覺啦! (下一期:關西day3--奈良、環球片場)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

2004關西東之旅 (7)—關東‧箱根深度行Part 2

DAY 5   2004‧8‧19  (關東)箱根 (雕刻之森、大涌谷、蘆之湖、元箱根......) --> 東京-池袋 續上回的箱根深度行!雕刻之森參觀完後,我地就到車站準備轉乘登山纜車1號上大涌谷啦!為什麼叫纜車1號?因為呢隻纜車好似上香港太平山頂紅色果隻大大部,又斜又有樓梯比人行果隻囉。而且之後仲有2號同3號都係唔同ga! 上圖:毛毛細雨大涌谷纜車站外下圖:風吹開雲霧及細雨後的清晰景象,與上一張只有5秒左右的時間差,可見風之強勁 因為今天遊客都好多,日本、歐美、香港及我地澳門人都有,好迫人呀~~等了10分鐘才進入纜車,都只有站著。看著纜車一路上山,成日都驚佢咁多人會唔會跌返落下ga~~其實就唔駛驚,因為日本人好著重安全,纜車1號到了終點站,大家都下車,而係纜車站內有紀念品及雪糕賣,但我地都忍手,原因係驚唔夠時間,之後快步轉搭纜車2號(好似本澳的松山纜車or香港昂坪洲那種銀色新穎纜車,最多載6人。),搭2號纜車時有一位朋友表現出驚慌的樣子,原來佢好驚搭呢d,因為佢驚唔安全,而且我地仲係纜車內換位呀!影相呀!攪到搖下搖下,而且下面就是熱硫磺,就算唔跌死都會蒸熟同臭死,再者因為天氣不好,烏雲密佈且有雨粉,所以佢就更驚! 其實我地都有少少驚,因為驚大雨及大風,纜車停駛我地d遊客就pk啦!當然最後安全到達大涌谷,不過一出車站就大風到死死下,話哂都係高山,d風呼呼聲,有d日本人仲企唔穩tim。我地見到咁,當然二話不說,快快沖入去大涌谷影相、觀光,以及食了它最出名的《黑玉子》,它是溫泉蛋,因為有硫磺,所以蛋殼被弄成黑色。相傳食了一個黑玉子可延壽10年,兩個就20年,但如果吃了三個或以上就減壽20年。其實都係話比大家聽《小食多滋味,多食壞肚皮》,以及唔好貪心而已。下圖為工人取回黑玉子情況。 在排隊買黑玉子時撞見之前在纜車1號上我們讓坐給他們的一對老夫婦,他又給了名片我們,大家又一齊拍照留念,回澳後我們照地址寄返相比佢地,當然佢地都一樣啦! 拍照後買了少少手信,原本諗住搭纜車3號(好似海洋公園最舊款果d成個鳥籠,好危險果d feel) 直接下山去蘆之湖,本身我係咁樣安排ga,但因為天氣差、風太大的關係只好原路回程,回到之前有雪糕賣的纜車站食左雪糕之後就搭返纜車1號下山,之後轉乘較費時的巴士(唯一可行辦法)到蘆之湖。下圖為蘆之湖,直望應可見到富士山,左邊為停泊之參觀船,可惜天氣差唔開。 到達蘆之湖後當然亦感受到強風,而且因下微雨關係,看不到遠處的富士山,留下少少遺憾啦!當然我們又影下相先啦! 之後步行去到元箱根,元箱根是以前出入江戶的必經關口呀,亦有好多古時的遺址,又有一個關於當時事蹟的博物館,所以駐足時間比較耐。 下列的各圖都是元箱根的資料圖、風景及博物館內拍下的。 最後回到蘆之湖車站手信店買了好多食得的手信,如溫泉饅頭、溫泉餅、豆沙餅、草餅、日式和菓子等等,因為呢度既售價好平,比出面平20%,可能因為比較遠的關係,但都買到箱根的手信,haha~~ 之後就搭返巴士回去電車站返酒店取回行李,準備出返去大城市啦,開始我地既東京玩樂啦!我地下榻的酒店位於東京池袋,池袋駅北口東橫INN,於網上預訂的,非常經濟,長年爆滿的商務酒店,真係用一個正字來形容。因為用4百多元一晚的價錢,有一間套房,包括按摩浴缸及客廳、雙人大床兩張,絕對正到死啦! 由於又係搭最後一班車回東京,所以到池袋時已經6點多,check in完出返黎已經成8點,晚餐食左日式漢堡扒餐,係池袋60階通內一間地下室餐廳。之後行一陣就回酒店,因為好多shop都開始close door呀! (下一回:東京觀光行)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (8)—關東‧觀光東京

DAY 6   2004‧8‧20  (關東)池袋 --> 淺草雷門 --> 上野 --> 銀座 --> 澀谷 --> 原宿 --> 新宿 --> 池袋 上一回剛從箱根回到東京,今天才是正式的東京觀光行第一天,不過大家都說:『阿乃,你是否plan得太多行程呀!一日行唔行得哂ga?』但事實證明係行得哂ga! 一早8:30出發,先到淺草,雖然我已經黎過2次,但因為有4位未黎過,所以就帶大家一齊去啦!再者咁早就未有鋪頭開啦!係咪?到了淺草,大家一定會諗到指定觀光點,對!沒有錯~~就是淺草寺、雷門大燈籠、大草鞋,以及手信街,最後就是淺草的落語傳統技藝劇場。 因為時間緊迫,所以大家都快步行走,一到淺草寺,已經見到好多旅行團各據一方霸地盤,我地去度已經人山人海,只不過是9:00左右,D鴨仔真係好勤力呀!到寺院門口,我們個個都去左求籤,而日本人有個好得意既習俗,就係求完籤自己去取籤紙,睇完之後默默禱告,之後將籤紙打結繫在附近的祈福架上。當然求籤要自動自覺畀錢呀~~(日本人是很自律的,而我們也不可以影衰我地港澳人,對不對!) (大合照) 之後大家觀光一返,拍下照,之後就到寺院前的仲世見通逛一逛,不過d野都幾貴,想買都買唔落手啦!最後係雷門燈籠留影,這個是必做動作啦,還叫一個日本婆婆幫我地手tim,佢好好人立即答應了! (個人獨照) 完了淺草雷門的行程,我地好快落返地鐵,向平價天堂集中地的上野進發,到了上野尋找廣小路出口,一出車站,我們見到一間七層高的玩具店,它叫YAMASHIROYA,是較大型的玩具百貨,不論食玩、扭蛋、公仔、模型、電子玩物至主題玩具都有,真係男女都ARM行既toy shop呀!我們逗留左成個幾2個鐘,因為太大啦,所以要搵返佢地都好難! 終於買到一袋二袋離開YAMASHIROYA,轉入橫街走入『阿美橫町』,就是我所說的平價天堂,在此個個大有斬獲,女士們竟然在一間鞋店內狂殺價,最後她們每人買入一對日本布鞋,以港幣$12.5一對的價錢,而我亦以港幣$60的價錢買入一對gen皮男裝布鞋,之後仲有8折優惠卷送返比我地,真係成為佳話,我真係講到而家呀!之後之去了二木の菓子掃零食及手信。最後去了位於街內的一間壽司放題,一個價錢吃得飽飽,只不過是1070 yen。(但各位到日本要注意,叫的東西一定要食哂,唔可以剩下,否則要支付雙倍費用呀!) 雖然只在上野逗留了4小時多,但我們已經買了數十袋戰利品啦!不得不回酒店卸下行裝。 回酒店卸裝後,我地前往銀座的中央通逛一逛,以及在和光鐘塔前留影。其實銀座因為高樓大廈太多,所以街道沒有什麼陽光可言。之後到了澀谷,一出車站就感受到擠迫,人太多了,而且那些縱橫交錯的斑馬線,我仲特登爬高影低d人流,真係幾恐佈ga~~ 上圖:銀座中央通的和光鐘塔;下圖:銀座中央通 行了數間商場,買了TACO燒食,之後就去原宿啦!原宿的竹下通,我們訂好只停留1小時左右,大家就立即去買自己想要買的東西,女士們一到此又有大斬獲啦!又衫又袋,但我地呢d男士就真係冇野arm買,why?賣男裝的鋪頭都係以滑板裝那些潮服為主,我又點會arm呢?之後我就去左全日本連鎖規模最大的藥妝店幫d姨媽姑姐搵藥膏,以及睇下d gel及洗面用品。跟住見仲有d時間咪去左吃班戟才回集合地點,等齊人就出發去最後一站新宿啦! 上圖:澀谷地標109;下圖:澀谷車站內的斑馬線 到達新宿已經是晚上7點左右,我們去行下d商場,因為有好多都準備關門了,所以草草一逛就算。之後就去了思出之橫丁找食,但好像沒有大家的心水,最後大家都係決定買松屋ga,因為有人已經餓到死死下,所以都冇點樣繼續去搵,食返我地最熟識的飯店吧! 上圖:新宿街道 食完飯就去了新宿的歌舞伎町見識下,當我們一入去,見到好多黑人,我們初時以為是遊客,但原來佢地係"扯皮條"(原來日本都有輸入外勞,不過佢地d工作都幾特別播!),他們個個拎住一個牌係度叫賣。而且我地見人流好多,就想出返去,因為都幾恐怖啦~~正當這時,我們其中一位朋友(除了我之外,他是另一位帶guide),就比一位黑人扯皮條行埋黎摸佢個胸,而口中以英文講:"你應該有興趣,有需要吧!"。而我個friends就撥開那個黑人的手,快步向前行,當時我就係佢隔離,所以睇哂成件事的經過。(這件事都算係旅程中一段難忘經歷!) 最後我地以最快的步速離開歌舞伎町,並在一丁目的牌下拍照後,就回池袋啦!(其實新宿的歌舞伎野一丁目比較雜,切忌單獨進入,內有"泥捧",又有扯皮條,又有鴨店,所以男女進入都唔多安全,所以要一大班人行事,我地係門口影相都好驚,驚有人行埋黎偷野,亦都唔敢搵人幫忙影相,唯有我自己影啦!) ---------------------------------------------------------------------------------------(橙色字有hyperlink,可以連結到之前所說過的地方)日語教室:泥捧 - 小偷TACO燒 - 章魚丸---------------------------------------------------------------------------------------編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (9)—お台場副都心

DAY 7   2004‧8‧21  (關東)池袋 --> 御台場 (未來科學館、Mega Web、富士電視台、海濱公園、購物中心......) --> 池袋 上回講左瘋狂疾走東京各區,今回就講講待了一整天在台場的day7。 一大清早起床,食過早餐就要快d去台場啦~~因為消息說如果碰上通勤高峰期就不得了啦!所以9:30已經到了"新橋"站,它是百合海鷗號的總站,在此可購買一日乘車票。一日乘車票包了一程觀光船及無限搭百合海鷗號穿梭台場各區,只需900 yen,好抵呀~~如果在台場花費一日時間的你,絕對要買! 一到新橋總站,已經見到長長的人龍在自動賣票機排隊買票,好誇張,好似過關咁~~(乜d人唔駛返工ga咩,咁得閒去玩ge),我地梗係快快咁排隊買一日乘車票啦,一買要買6張係慢少少,d人都好有禮貌,唔會催你,知你係遊客,有時仲有幫你,非常好人。 買左飛就梗係上月台搭呢ga百合海鷗號啦!它是一架無人駕駛單軌架空列車,經彩虹橋入台場。途徑台場各區,而雙線來回走向。台場係一個都市新試點,以人工島的方式填海出來的新區域,有d似我地澳門的皇朝區及新公佈的tapia兩個填海方案。 上到月台,見到好多人已經係度等緊車,心想應該都冇位坐啦!算吧~~後生仔企下冇所謂!我地第一站係 "船之科學館站" 落車。(下圖:船之科學館外觀) 步行去未來科學館,這個是我最想睇的館之一,因為有一個實時地球睇,非常有趣,它是由美國太空總署Nasa提供數據資料的。(下圖) 地球後面的凌空走廊像是衛星的行徑似的,那我們就像衛星看地球般似的,又是一個特別的經驗。未來科學館內有很多的東西玩,如動感劇院、科學原理、天文星相及氣象模型與實例示範等,還有防災屋、新型電汽車、新型JR......數之不盡,又有幾個劇場供人預訂入場,有幾套立體科學電影,亦介紹了好多未來新科技,當然唔少得日本出名的人型機械人啦。 在未來科學館頂層部分,見到佢有d好有創意既櫈,好得意,又有試坐!haha (下圖) 而另一樣就是屋頂的佈置,好像片片落葉,又像鏻光片片一樣,好特別的設計,一流design品味,於館內到處可見。(下圖) 離開科學館之後,去了後面的Wendy's姐姐度食漢堡做午餐,因為已經成12點半啦。去返船之科學館站搭返百合海鷗號去Mega Web,它是豐田汽車館,有真車試駕(當然真有國際車牌先jar得啦),又有賽車立體影院,仲有電動車試駕繞場一圈,好好玩的。而且仲有多部新款汽車任坐任試仲住影相tim~~之後行左d商場,見到有人係廣場度免費派"日清雞仔面",咪諗住去拎,點d條龍鬼咁長,就打消左個念頭。轉移去了附近的電子遊戲機中心,裡面有齊那上"根肉擋台"的game,又有d扮野模擬過山車、騎馬機及賽車等,及其他多款有趣玩意。 之後就搭車返去"台場站",去一去富士電視台影下隻藍色狗仔啦! 以及去附近的Aqua city、睇下野,之後就去了台場海濱公園等影下相,等日落的彩虹橋亮燈影相呀! 等呀等,終於等到彩虹橋亮燈啦!不過都未夠夜,唯有獨左呢張相,好可惜我用了ISO400,令d雜訊太多,張相既質素差左d,而且有趕住去搭6:45的尾班觀光船,所以不得不走啦! 搭船回日之出淺橋後,跟著人群行就回到百合海鷗號的站台,搭車回池袋啦!當晚係池袋的酒店附近食一間叫"お好味燒"的日式薄餅店,由於我地唔識整,所以店員幫我們煎個薄餅呀!因為已經太累,所以冇乜點影相,大家的倦容寫在面上(包括我),每日咁早起身,每晚又成1,2點先sleep,所以大家徹底比我玩謝哂,最後我決定未來兩日輕鬆少少,晚一點才起床~~haha~ 見大家都好累,所以冇提出夜遊池袋,早d回酒店沖涼sleep!明天準備去早上橫濱,傍晚回到池袋,話哂係池袋住咁多日都冇好好咁行過池袋,有點兒浪費呀! 遊完台場,我覺得台場好新穎,同非常高科技,建築又新,真係專登打造出來的區域,有自己的風格,行高科技路線,都幾好!只不過係旅遊區,所以d野都比較貴呀! 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (4)—關西奈良及環球影城

DAY 3   2004‧8‧17  (關西)大阪--> 奈良 (文化遺產) -->大阪環球影城 -->大阪 同第二天一樣,一早起身吃個大飽的歐日式早餐,之後整裝出發啦!今日早上要去奈良睇文化遺產同探下D鹿仔(我中學時去過,記得好多鹿周圍走ga~)所以又要搭JR去奈良,車程約1小時15分。大家亦不忘睡覺,而我又係唔sleep,欣賞下車廂外由繁囂都市建築,慢慢變成傳統日式獨立屋,好像穿越時空似的,我覺得好有趣!不知不覺就到了奈良駅。 循例又係先去觀光案內所,一進去他們就很欣切地招待我們,亦細心地為我們解釋,而且有服務員又識國語,那我們就用國語溝通囉!仲建議我地可以book佢做導遊,帶我地遊奈良2小時,但我們權衡過時間,所以婉拒了,因為我地要3點左右回到大阪並進入環球影城,所以只想在奈良行一行,感受下古城的悠閒而已。 10點半左右就正式開始奈良之旅,當天的天氣不太好,早上有微雨,到奈良時就密雲,攪到我地都不知幾擔心,因為今天全露天活動呀!一出觀光案內所就去文化遺產---奈良公園及興福寺周邊景觀建築參觀,一到門口就已經見到好多鹿,唔知點解d鹿一直對的個friends好有興趣,唔知個friends身上是否有食物,所以一直走埋去,haha~~擾攘一返才可以入去,由門口到公園一直都好多地雷,大家都小心奕奕,以防中招。 欣賞了日本的文化遺產建築---奈良古建築群,它有著古代日本的濃厚風情及人民科技結晶,也擁有著中國唐宋時期的建築韻味,突然有一感覺,為什麼日本保有那麼多中國的傳統(包括茶藝、花藝、建築、博奕棋藝、建築、騎射、武術御劍、文字、民間工藝)?而反觀現今我國有多少能傳存至今,又看看日本將其發揚光大,轉化成自身大和文化,亦成為了聞名於世的日本劍道、日本茶道、日本柔道、日式建築、日式亭院、盤景藝術、日本包裝......那有什麼人提到中國呢?那些不是中國的嗎? 好容易就明白,日本是"捉到鹿懂取角",計仔又多,在資源貧乏的國境,只能精益求精,創新求變,豎立大和民族成為一個強國,用科技及國產以經濟手段進軍全世界,他們於戰後的努力,他們成功了!現在有邊一個家中沒有日本的產品,電飯煲都總會是日立啦! 言歸正傳,建築真的很中國,而且還有藏傳佛教的完素在內,所以非常可觀的一個文化遺產(所以本澳被列入文化遺產,真的是很有價值才能成功呀,各位來澳一定要去睇下啦,了解埋背後的歷史,這樣才是參觀一個文化遺產的態度)。等到大家都參觀完公園及寺廟之後,在市內逛一下,又影下相買下手信之後就準備回大阪,向環球影城出發了。 到了環球影城,買了票入場,而天色又更差了,還下著微雨,不過並沒有因而掃興,入場內玩了不少遊戲,唯獨每個都要排成個鐘頭。 一直到了晚上7點左右,我地正排緊一個史力加4D電影(下圖) 時,突然來了一場大雨,最好笑的是我們以為頭頂的帳篷可擋雨,原來它是一個紗網,所以看似密封,原來......結果所有人都走避,有雨傘的人急忙好傘擋雨,好彩我地6個人有3把雨傘,所以不用離開,還可以排前一點。 正當我們終於可以入場了,工作人員就說因為暴雨及狂雷的關係,驚雷電打中建築物為由,現在開放給你們只為了避雨而已,史力加個4D電影不會開始,直至雷暴結束為止,當然在場人士包括我地真係全身濕透啦! 最後就去了紀念品店,又拍下照,食個吃晚飯就係10點左右離開了universal studio啦!(當然最後都冇睇到果個4D電影啦!有d遺憾囉!) (下一期:第5篇 關西東過渡)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (5)—驚險過渡關西東

哈哈~~前陣子比較忙,冇時間寫blog呀!現在繼續貼日本遊記第五章。 DAY 4   2004‧8‧18  (關西東)大阪--> 東京 --> (經新宿--小田原) --> 箱根 早上與平時一樣,"拿拿林" 吃個早餐之後,今天只在酒店附近行一陣,行左附近的 Sakuraya就返酒店整理一下行李就準備坐機場巴士去返大阪國際空港搭ANA國內線去東京羽田空港。 航班於中午12:00準時起飛,1點半就到東京羽田空港。在航機上因為check in遲的關係,我們分開了坐,而坐我隔離的日本人又係識講中文(國語),原來佢係做導遊ge,帶中國人多,所以有學過,在機上的一小時我地都有talking,我又問下日本既野,佢又問下澳門既事,好快就過左一小時。(之後同我一齊坐既friends話我真係好顛,幾乎係人都arm talk,冇乜野可以難同我喎,係澳門已經係咁,估唔到黎到日本同d日本人一樣係咁,真係要寫過服字比我!)haha~~多謝佢地既誇獎啦~~現在我的職業都係成日要講野ge~haha~~ 言歸正傳,下機後,我們兩話不說又係要快速過關啦!那有人就問又仲乜咁趕呀?其實我地今天又係要趕車,因為我地要入箱根,需要由羽田搭JR去小田原,再轉箱根鐵路,而且最後入箱根的班次時間為4點15分,所以好趕。 終於係3點左右去到了小田原,需然之後我地找到入閘口,但找不到箱根周遊票的售賣counter(小田原箱根旅遊案內所),當然我同另一個帶隊的分頭找,因為太大又與商場連接在一起,所以擾攘左好耐,嚇到我地以為入唔到箱根(因為我地早前已經book哂酒店),唔通今晚要露宿街頭,我唔要呀! 其餘在入閘口等的朋友當然更好心急啦,因為佢地唔知我地現在的情況,我只叫佢地一定唔好走開去shoppong呀,否則過左時搵唔到佢,就真係齊齊入唔到箱根啦。最後我係3:30找到個counter,問左好多資訊同get左好多小冊子,因為又有職員識講中文,親切d又易明d,跟住我果個friends又可以同佢溝通到,唔駛我用日文問佢,因為佢地普遍講得快,好難聽明白,不竟在澳門唔係成日有得練聽講(成個旅程都碰到好多識講國語/廣東話的日本人,非常lucky呀!),之後亦買左周遊票,望望錶,弊!已經3:45分,嘩!拿拿聲奔跑回閘口啦~~(因為距離左一個大商場)跑到我死咁滯,最後係4:05分入閘,只係arm arm好入到閘,之後就close啦~~真係好險~~~ 上到車就好似鬆一口氣咁,放好行李坐好之後就定返落黎,由於前一天d天氣都唔好,今天也是烏雲密佈,我好驚佢又落雨呀,咁咪浪費左箱根咁靚既景色及環境囉!好彩,個天此終都冇落雨,只係陰天姐。從車上又係同一情景,他們sleep哂,只有我同另一個沒有sleep,欣賞車廂外的風景,由繁囂鬧市到古式古香的小屋仔,最後到大草原、農田咁,我覺得有種舒服的感覺,之後慢慢上山,到了箱根站就要開始轉搭冇冷氣既登山電車去箱根湯本站,整個過程都是一個不錯的體驗,在澳門根本冇機會坐登山電車,既懷舊又好feel。 花了兩個多小時的車程,終於到達酒店雲集,旅客進入箱根的必經入口--箱根湯本。所以旅客都係stay係呢度ga,我地住車站最近的,在小瀑布旁的箱根湯本富士屋酒店,是一間無料溫泉酒店,我地check左in就急急去商店街找野吃,不竟食左午飯到現在都未食過野,但由於鄉下關係,好多鋪頭係6:30已經關門,最後我地去了一間燒肉店食,味道非常不錯,價錢亦可以接受,返酒店前仲去了7仔買少少零食才回去。 一日的趕車趕飛機的疲倦,當然要去浸溫泉去洗滌一下啦!我地男湯有三個池,兩個室內一個室外,我like浸室外,因為溫度冇咁高(我本身好怕熱,熱得滯會呼吸困難ga),有微微的涼風吹過,真係好寫意。我地3個男仔一齊浸,有一個就話怕醜唔同我地一齊,佢之後自己浸。haha~~浸果陣時就冇乜人,只有一個30幾歲同一個老伯,所以好清靜,好似包場咁~~haha~~(三級部分省略......) 浸完溫泉就回房sleep啦!明天繼續行程啦! 有一些大家不可不知的浸溫泉小知識:通常日本的溫泉係分男(殿方)、女(婦人/美人)湯而且係全裸入湯(泳裝/毛巾一律不得入湯),仲要係溫泉旁的沖涼設施沖好涼先可以浸呀!溫泉內有小毛巾供應比你用於放在頭上降溫呀!浸溫泉一次不可超過15分鐘,一定要起身休息一下或浸冷泉。而且你的衣服及物品在入湯前的更衣室,拎個藍放低哂係藍裡面,之後放係任何一格空櫃內,當然包括內褲及拖鞋啦,赤條條乜都冇咁入湯旁邊沖涼ga~ 註:-----------------------------------------------------------Sajuraya -- 日本三大電子百貨箱根周遊票 -- 3日內任搭箱根內所有交通工具,並包來回 箱根<-->小田原 火車一次無料 -- 免費湯 -- 熱的水(意即溫泉) ----------------------------------------------------------------(下一回:第6回 關東箱根)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.
- Advertisement -
Macau
晴,少云
24.1 ° C
25 °
23 °
78 %
3.6kmh
20 %
週三
23 °
週四
25 °
週五
22 °
週六
19 °
週日
18 °

社交網絡

10,216粉絲Like
1,096追隨者Follow
10,136追隨者Follow
35追隨者Follow
27追隨者Follow
374用戶訂閱

最人氣文章