28 C
Macau, MO
星期三, 五月 23, 2018

2004關西東之旅 (4)—關西奈良及環球影城

DAY 3   2004‧8‧17  (關西)大阪--> 奈良 (文化遺產) -->大阪環球影城 -->大阪 同第二天一樣,一早起身吃個大飽的歐日式早餐,之後整裝出發啦!今日早上要去奈良睇文化遺產同探下D鹿仔(我中學時去過,記得好多鹿周圍走ga~)所以又要搭JR去奈良,車程約1小時15分。大家亦不忘睡覺,而我又係唔sleep,欣賞下車廂外由繁囂都市建築,慢慢變成傳統日式獨立屋,好像穿越時空似的,我覺得好有趣!不知不覺就到了奈良駅。 循例又係先去觀光案內所,一進去他們就很欣切地招待我們,亦細心地為我們解釋,而且有服務員又識國語,那我們就用國語溝通囉!仲建議我地可以book佢做導遊,帶我地遊奈良2小時,但我們權衡過時間,所以婉拒了,因為我地要3點左右回到大阪並進入環球影城,所以只想在奈良行一行,感受下古城的悠閒而已。 10點半左右就正式開始奈良之旅,當天的天氣不太好,早上有微雨,到奈良時就密雲,攪到我地都不知幾擔心,因為今天全露天活動呀!一出觀光案內所就去文化遺產---奈良公園及興福寺周邊景觀建築參觀,一到門口就已經見到好多鹿,唔知點解d鹿一直對的個friends好有興趣,唔知個friends身上是否有食物,所以一直走埋去,haha~~擾攘一返才可以入去,由門口到公園一直都好多地雷,大家都小心奕奕,以防中招。 欣賞了日本的文化遺產建築---奈良古建築群,它有著古代日本的濃厚風情及人民科技結晶,也擁有著中國唐宋時期的建築韻味,突然有一感覺,為什麼日本保有那麼多中國的傳統(包括茶藝、花藝、建築、博奕棋藝、建築、騎射、武術御劍、文字、民間工藝)?而反觀現今我國有多少能傳存至今,又看看日本將其發揚光大,轉化成自身大和文化,亦成為了聞名於世的日本劍道、日本茶道、日本柔道、日式建築、日式亭院、盤景藝術、日本包裝......那有什麼人提到中國呢?那些不是中國的嗎? 好容易就明白,日本是"捉到鹿懂取角",計仔又多,在資源貧乏的國境,只能精益求精,創新求變,豎立大和民族成為一個強國,用科技及國產以經濟手段進軍全世界,他們於戰後的努力,他們成功了!現在有邊一個家中沒有日本的產品,電飯煲都總會是日立啦! 言歸正傳,建築真的很中國,而且還有藏傳佛教的完素在內,所以非常可觀的一個文化遺產(所以本澳被列入文化遺產,真的是很有價值才能成功呀,各位來澳一定要去睇下啦,了解埋背後的歷史,這樣才是參觀一個文化遺產的態度)。等到大家都參觀完公園及寺廟之後,在市內逛一下,又影下相買下手信之後就準備回大阪,向環球影城出發了。 到了環球影城,買了票入場,而天色又更差了,還下著微雨,不過並沒有因而掃興,入場內玩了不少遊戲,唯獨每個都要排成個鐘頭。 一直到了晚上7點左右,我地正排緊一個史力加4D電影(下圖) 時,突然來了一場大雨,最好笑的是我們以為頭頂的帳篷可擋雨,原來它是一個紗網,所以看似密封,原來......結果所有人都走避,有雨傘的人急忙好傘擋雨,好彩我地6個人有3把雨傘,所以不用離開,還可以排前一點。 正當我們終於可以入場了,工作人員就說因為暴雨及狂雷的關係,驚雷電打中建築物為由,現在開放給你們只為了避雨而已,史力加個4D電影不會開始,直至雷暴結束為止,當然在場人士包括我地真係全身濕透啦! 最後就去了紀念品店,又拍下照,食個吃晚飯就係10點左右離開了universal studio啦!(當然最後都冇睇到果個4D電影啦!有d遺憾囉!) (下一期:第5篇 關西東過渡)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (13)—後記

終於寫完了屬於日本的第二部遊記啦!真係寫到我死死下,好在有d資料同之前旅程mark低既重點係度!如果唔係都幾難寫得到出來!當然d相都幫我唔少!打這個關西東之旅其實係咁多個最吃力,因為寫到中途就因為忙及趕工加拿大的遊記,而丟低左日本遊記好耐,令好多本blog的訂閱者走左唔少~~haha~~不過今日終於完成這部遊記了!太好啦大家可以比返d回應我,等我下次再寫好d ga! 預告篇:這個第二部日本遊記就寫完啦,黎緊既第三、第四部的日本遊記都要加快趕工,分別是:第三部日本遊記:《05' Expo 名古屋『愛‧地球博』紀行》主要記敘上一年去名古屋參觀5年一度的《世界博覽會》,本次主題為《愛‧地球博》,有好多日本的新科技及世界各地展館,我會在遊記中介紹整個博覽會,雖然係遲左成年,但都記憶猶新,希望各位會鍾意啦! 第四部日本遊記:《九州2001 回憶相集》主要係scan返d相上來,回憶返01年去九州玩的情況,因為年代久遠,已經有好多野唔記得,所以係以相為主。 另外亦以敲定本年7月9日飛去日本旅遊一星期,到時返來又會有第五部遊記的出現!hehe~~同時亦會提供更多日本的新資訊、日本人習俗及遊日禮儀法則等~~希望各位可以繼續捧場啦! 而各位捧場既《新加坡遊記》就要等等,我承諾各位等我寫完『愛‧地球博』就立即提速寫起佢!不便之處,敬請原諒! 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (9)—お台場副都心

DAY 7   2004‧8‧21  (關東)池袋 --> 御台場 (未來科學館、Mega Web、富士電視台、海濱公園、購物中心......) --> 池袋 上回講左瘋狂疾走東京各區,今回就講講待了一整天在台場的day7。 一大清早起床,食過早餐就要快d去台場啦~~因為消息說如果碰上通勤高峰期就不得了啦!所以9:30已經到了"新橋"站,它是百合海鷗號的總站,在此可購買一日乘車票。一日乘車票包了一程觀光船及無限搭百合海鷗號穿梭台場各區,只需900 yen,好抵呀~~如果在台場花費一日時間的你,絕對要買! 一到新橋總站,已經見到長長的人龍在自動賣票機排隊買票,好誇張,好似過關咁~~(乜d人唔駛返工ga咩,咁得閒去玩ge),我地梗係快快咁排隊買一日乘車票啦,一買要買6張係慢少少,d人都好有禮貌,唔會催你,知你係遊客,有時仲有幫你,非常好人。 買左飛就梗係上月台搭呢ga百合海鷗號啦!它是一架無人駕駛單軌架空列車,經彩虹橋入台場。途徑台場各區,而雙線來回走向。台場係一個都市新試點,以人工島的方式填海出來的新區域,有d似我地澳門的皇朝區及新公佈的tapia兩個填海方案。 上到月台,見到好多人已經係度等緊車,心想應該都冇位坐啦!算吧~~後生仔企下冇所謂!我地第一站係 "船之科學館站" 落車。(下圖:船之科學館外觀) 步行去未來科學館,這個是我最想睇的館之一,因為有一個實時地球睇,非常有趣,它是由美國太空總署Nasa提供數據資料的。(下圖) 地球後面的凌空走廊像是衛星的行徑似的,那我們就像衛星看地球般似的,又是一個特別的經驗。未來科學館內有很多的東西玩,如動感劇院、科學原理、天文星相及氣象模型與實例示範等,還有防災屋、新型電汽車、新型JR......數之不盡,又有幾個劇場供人預訂入場,有幾套立體科學電影,亦介紹了好多未來新科技,當然唔少得日本出名的人型機械人啦。 在未來科學館頂層部分,見到佢有d好有創意既櫈,好得意,又有試坐!haha (下圖) 而另一樣就是屋頂的佈置,好像片片落葉,又像鏻光片片一樣,好特別的設計,一流design品味,於館內到處可見。(下圖) 離開科學館之後,去了後面的Wendy's姐姐度食漢堡做午餐,因為已經成12點半啦。去返船之科學館站搭返百合海鷗號去Mega Web,它是豐田汽車館,有真車試駕(當然真有國際車牌先jar得啦),又有賽車立體影院,仲有電動車試駕繞場一圈,好好玩的。而且仲有多部新款汽車任坐任試仲住影相tim~~之後行左d商場,見到有人係廣場度免費派"日清雞仔面",咪諗住去拎,點d條龍鬼咁長,就打消左個念頭。轉移去了附近的電子遊戲機中心,裡面有齊那上"根肉擋台"的game,又有d扮野模擬過山車、騎馬機及賽車等,及其他多款有趣玩意。 之後就搭車返去"台場站",去一去富士電視台影下隻藍色狗仔啦! 以及去附近的Aqua city、睇下野,之後就去了台場海濱公園等影下相,等日落的彩虹橋亮燈影相呀! 等呀等,終於等到彩虹橋亮燈啦!不過都未夠夜,唯有獨左呢張相,好可惜我用了ISO400,令d雜訊太多,張相既質素差左d,而且有趕住去搭6:45的尾班觀光船,所以不得不走啦! 搭船回日之出淺橋後,跟著人群行就回到百合海鷗號的站台,搭車回池袋啦!當晚係池袋的酒店附近食一間叫"お好味燒"的日式薄餅店,由於我地唔識整,所以店員幫我們煎個薄餅呀!因為已經太累,所以冇乜點影相,大家的倦容寫在面上(包括我),每日咁早起身,每晚又成1,2點先sleep,所以大家徹底比我玩謝哂,最後我決定未來兩日輕鬆少少,晚一點才起床~~haha~ 見大家都好累,所以冇提出夜遊池袋,早d回酒店沖涼sleep!明天準備去早上橫濱,傍晚回到池袋,話哂係池袋住咁多日都冇好好咁行過池袋,有點兒浪費呀! 遊完台場,我覺得台場好新穎,同非常高科技,建築又新,真係專登打造出來的區域,有自己的風格,行高科技路線,都幾好!只不過係旅遊區,所以d野都比較貴呀! 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (11)—體驗橫濱番外:MM21的夜景篇

下一章講到橫濱的MM21,今回番外篇貼上一輯由橫濱地標塔拍下的橫濱夜景,讓大家一同來感受下夜幕下的新橫濱的魅力! (Zoom近左海風遊樂場的大摩天輪) (下兩張是橫濱NTT分壇及空地,夜晚果然可以hide哂d空地,好靚呀!) (另一邊的夜景,向東京的方向呀!) (下兩張另一邊的夜景,有海上陸橋呀!) (下三張都係海風遊樂場及旁邊似杜拜帆船酒店咁既建築物) 大家覺得怎樣呢?日暗與夜景是否分別很大呢?我當然覺得夜間簡直是~~~美呆了!haha~~雖然是新的區域,但它絕對係好靚既新型城市。如果想睇真d的話去相簿度睇啦! 這批相其實只是一部分,仲有10張左右沒有貼上來,原因是差不多一樣的,相簿裡會多幾張。另外就是上面d夜景相係我個friends影既,唔係我影,係用數碼專業相機+腳架,仲使用了慢快門拍攝才有第一張的效果!(其實有好多人都影左一D差不多同上面一樣既角度及感覺既相出來ga!)編:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (3)—關西京都

DAY 2   2004‧8‧16  (關西)大阪-->京都 (金閣寺、平安神宮、清水寺.....、京都火祭)-->大阪 一大清早就起床吃一頓豐盛日西式早餐後從大阪出發去京都,當然選坐新幹線啦!需時約一個半小時就到京都了,各人兩話不說就爭取時間在車上休息。我基本上都唔會sleep,因為要留意幾時下車嘛!所以就聽下歌囉! 到了京都駅之後,第一時間梗係去站內的觀光案內詢問行程路線、拎地圖、問火祭的時間及最佳路線等有關資訊。唔講你唔知,其實一些JR大站內都有觀光案內所供自助遊的遊客查詢及購買當地有關門票、一日遊巴士票、免費地圖及資料等,而且京都駅觀光案內係有識講國語的日本職員tim,所以好快就可以完成查詢,走出來自己plan景點次序,以及確定巴士番號啦! 有一樣野,大家都應該知,日本是一個守時的民族,不論人、JR、地鐵,原來連巴士都一樣準時,而且巴士站的電子牌會有提示幾號巴士還有幾個站就到在下的巴士站,真是先進到不得了。 我們首站去金閣寺先,它是金漆外牆,金光閃閃,倒影在湖上,尤其漂亮,成為謀殺菲林的要點。而且寺範圍內還有好多地方遊覽,白蛇洞等。最後還吃了一個大雪糕tim~~haha~~ 之後我地去第二站的平安神宮,這是京都最著名的神宮之一,因為京都已往是首都,而平安神宮更是首都重要建築物,掌管整個東瀛的命脈,由當時的陰陽師、國師主理,為天皇占卜吉凶等事情。而建築風格以中國唐朝庭園風格為主,加入風水陰陽的佈局擺設,於前院設有左青龍及右白虎的清泉,現在已經成為遊人必到之地,清泉更相傳飲用後能治百病、健康長壽呀!    當然最後在平安神宮內殿前黎過大合照tim啦!(本人用了油畫效果,以免朋友的樣子曝光,haha~~不過他們來看我個blog的話,實睇到邊度係自己啦!)至於我呢,就是"左3" 站立的雞翼袖啦! 之後要吃過午飯後再去其他地方,又在平安神宮附近閒逛了一下,見到好多日本人著住傳統和服在街上走,原因是當晚是大文字火祭,日本人一逢有祭典就會穿和服,而且街上亦有古時的人拉車供遊人乘坐ga! 及後我地出發去第三站的清水寺,港澳人不會不知的,因為我地去既呢三個景點都係好出名既!而清水寺出名在於它歷史悠久,而清水寺的空中舞台更以全木建築,不落一根釘,非常罕見。 另外又有地主神社在旁,一走上去就發現很多小小的神壇及有顆岩石在地上,而全部都是祈求愛情的。而地上的兩顆叫戀愛占卜之石,相傳戀人矇眼於兩石向前行,如果能相遇就可以白頭到老;而未有戀人的單身人士,只有在任一戀愛石矇眼向前走如撞到異性又或是去到對面的戀愛石又找到的話,戀愛就好快到來啦!(不過信不信由你,而且因為係旅遊點,人太多,撞到人都好易姐。) 最後到樓下非常著名的泉水瀑布果度(正確名字唔記得lu),排隊入泉水,為什麼?這個泉出名在於它的三個泉眼,相傳能帶給人健康、金錢、愛情(由右至左),所以好多人都慕名而來,而我地當然係好貪心,一次裝埋三個泉眼的泉水。(偷偷告訴你們,我還帶了個膠樽裝水呀!haha~~) 不過其實冇乜特別,只不過係特別清涼,在炎炎夏日都係一個解暑好辦法,你睇下相中,幾多人係度排隊,我就已經飲左啦,你地都去裝返d健康、金錢、愛情返來啦! 遊玩完景點,梗係要係清水寺門前的商店街行下啦!有好多紀念品、日本傳統工藝、和菓子......應有盡有,一行就行左成個幾兩個鐘。(我們都是購物者嘛,一兩小時好閒姐) 六點鐘左右已經開始多人,有人食飯,有人現在先到京都,有人開始去各公園霸位睇火祭,道路上的車擠塞得好跨張,而等左好久都上唔到車,路又窄,而人不斷增多,而我們亦考慮回程時的情況,以及JR回大阪的班次,所以決定不參與火祭,而需直接回大阪,如果唔係,好可能要係京都街頭過夜tim呀! 回到大阪已經成9點半了,雖然大伙兒有點兒失望,睇唔到火祭,但也慶幸可以回到大阪,而且都已經好夜,如果睇埋的話,分分中冇JR返黎tim。之後到酒店附近的松屋吃過晚飯,又去了便利店買少少野就回酒店開會及沖涼睡覺啦! (下一期:關西day3--奈良、環球片場)編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.  

2004關西東之旅 (1)—遊記前傳及9天行程

---序---千呼萬喚始出來!一直都懶得寫返d遊記,現在要著力開始寫啦!今次寫的是2004年跟友人一起去日本關西關東之旅共9天。我寫的遊記將會以景點及區域為點,並加入景點及其他的資料,聽落好似旅遊資訊咁啦!亦希望可以幫到大家!亦期望可以好快咁寫完! 首先是文章的標題,格式會以 "2004關西東之旅 (x) 關西---大阪(y篇)"(x) - 代表章號。   大阪(y篇) - 地區 (上中下篇) ---行程前傳--- DAY 1   2004‧8‧15  (關西)香港-->大阪-->心齋橋及市內觀光 DAY 2   2004‧8‧16  (關西)大阪-->京都 (金閣寺、平安神宮、清水寺.....、京都火祭)-->大阪 DAY 3   2004‧8‧17  (關西)大阪--> 奈良 (文化遺產) -->大阪環球影城 -->大阪 DAY 4   2004‧8‧18  (關西東)大阪--> 東京 --> (經新宿--小田原) --> 箱根 DAY 5   2004‧8‧19  (關東)箱根...

2004關西東之旅 (10)—體驗橫濱:港區未來廿一

DAY 8   2004‧8‧22  (關東)池袋 --> 橫濱 (港區未來廿一) --> 池袋 今天主要是前往橫濱的新開發區域-----港區未來廿一(MM21),日本於前年設立的新區其中之一,主要由碼頭、商業區、遊樂場、地標塔、旅遊區等組成,與お台場、六本木、自由之丘等都列為新開發及重新改造的 "都市新生態",以區內完善的設備及科技,可讓大家不用走太遠已可滿足生活需求的都市範例,當然六本木成功了! 而今次我到的MM21,正是未完成的區域,地鐵線剛剛在我出發一個月才通車的新線,叫"未來廿一線",我都係去到先知可以搭到門口,由池袋去橫濱地標塔,需時半小時以上,大家一隨己往,一上車就有理冇理話知你,就倒頭大睡,當然又是我清醒啦! 到了Landmark Tower & 皇后廣場的那個站,出口就已經有觀光案內所,梗係又去看看有什麼著數野啦!取了地圖,拿了資料,便沿著斜坡往地標塔進發,一到入口,當然係要買TICKET啦,不過其實都幾貴ga,成1500yen,不過仲包括空中新奇水族館,咁就算啦! 升降機以超快的速度直升上這座橫濱最高塔的頂層(70樓),隻耳仔真係塞哂囉,因為佢係當時最快速度上升,仲有個速度計比你睇下佢有幾快,真係人都癲呀! 上到黎就係好靚呀個view,雖然天氣唔係太好,沒有太陽,但好彩冇落雨呀!(下圖:地標塔遠眺東京方向) 因為剛剛開放MM21區域不於一年的關係,雖然規劃好了,但仍有好多未建設的空地,感覺上都幾荒涼ga,但下次再去應該d空地都冇得七七八八啦!(下圖:NTT 在橫濱MM21的分壇,還有好多未開發地域)(下圖:地標塔遠眺東京方向,新的大廈都有自己的停機坪呀!) 下圖是海風遊樂場呀!朋友狂問我會唔會去,我一早就話因為時間緊迫,沒有時間去,而且並沒有安排時間到那裡,所以並不懂怎樣去! 看得遠景多,又掛住影相,行行下就行到去空中水族館啦!這裡當然有一般水中生物,亦有一些好有趣的海洋生物,大家看看下圖!(普通的藍色水母及龍王爺啦)-(下圖是一隻藍色的龍蝦,你見過未?)(再來一隻有手有腳的魚,用鰓呼吸,一定要在水中生活的呀!未見過了吧?) 睇完d咁得意既生物,而係時候落返去Landmark Tower的商場行下啦!呢度有好多名牌子,不過就唔係好arm我地,因為我地唔買名牌,反而對一間懷舊果子及玩具店好有興趣,還買了不少零食及糖,佢都幾平呀!之後我地又見到一間和風擺設及布藝店,當然又駐足很久啦!haha~~ 之後到了隔離的Queens Square行下,果間商場除了名牌之外,還有d潮品店、平價牌子等,比較適合我地,所以大家就自由活動個半小時,我呢又入左去潮品店度睇公仔、生活潮品,當然就係有收獲啦!(最鍾意"變幻七色沖涼鴨仔",但家中冇浴缸所以冇買到),之後仲有半小時,當然要盡下領隊兼導遊的責任,去地庫看看有什麼食店arm食又價錢平,並且排左位先啦~~(就打手提叫佢地下來食飯啦) 最後我揀左一間意大利面店舖,細細間好有特色,一個set lunch只不過是58蚊港元,ok啦!而且又多種選擇,由湯+前菜+意大利面+甜品+飲品,我揀左忌廉湯、芝士豬扒意粉、炸薯寶、雪榚及檸檬特飲,一個午飯就食到夠啦!之後返地鐵站之前就去了影下相 (文中第一張相,及下面呢張),我最鍾意係第一張相,因為好有藝術術感同好好feel呀!(又自已讚自己啦!haha) 其實我地只在橫檳逗留半天,因為有位朋友要去會自己d日本friends,但其他人又要就佢,所以就係咁比佢打亂左d行程,而我個人覺得,既然只有佢一個識,我地5個都唔識佢d日本朋友,為何仲要去見他們呢?之前day1就話可以大家一齊去食個飯,一起玩,今天又突然話比我地聽佢下午唔同我地一齊,獨自出遊,是不是對我地5個人有少少過份呢?(當時大家都心覺佢唔係好識遷就人,一直要人就哂佢~~唉~)所以我覺得一齊去旅行大家有商有量,行動一致,如要找friends的話就等自由時間先去啦~~就唔arm就索性唔好搵,冇謂要大家係度等你同朋友約會幾個鐘,我地就無無聊聊係到等啦!(當然我地都冇咁笨,佢去玩,咁我地梗係自己走去玩啦!) 最後我地5人決定回到池袋行街,因為一直以來雖然住佢池袋,但我地完全冇行過60階通囉!係時候要作最後掃貨啦!明天同一時間我地就已經係機場啦!返回池袋,我地大家就約一個時間食飯及集合,之後就四散去自己想去的shop,而我去了Tokyu Hands、Bic Camera、Praco、Uniqio等鋪頭,但因為時間只有3小時,所以tokyu hands只行了兩層(仲有6層未行),其他的都基本掃場式咁睇,亦沒有太多時間思考買定唔買,ok合適,價錢可以就放落車仔度~~(好似好誇張咁),我一d都唔誇張ga啦! 之後就同大家會合去食飯,食完飯就回酒店沖涼及開會,這個會議絕對緊要,因為大家都想知道明天有幾多小時自由shopping(最後衝刺),以及可以有幾晏起身,幾點pack行李,而且仲會有人要問我借錢買野,你諗下就知我已經唔係誇張啦! 留意下一回吧!(最遺憾的是我發現住係池袋咁多日,原來一張屬於池袋的相我都冇影過,而且係個個都冇影,因為唔係返來sleep,就係唔夠時間shopping,咁點會有人影相呢?haha) 下回預告:橫濱夜景! 編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.

2004關西東之旅 (8)—關東‧觀光東京

DAY 6   2004‧8‧20  (關東)池袋 --> 淺草雷門 --> 上野 --> 銀座 --> 澀谷 --> 原宿 --> 新宿 --> 池袋 上一回剛從箱根回到東京,今天才是正式的東京觀光行第一天,不過大家都說:『阿乃,你是否plan得太多行程呀!一日行唔行得哂ga?』但事實證明係行得哂ga! 一早8:30出發,先到淺草,雖然我已經黎過2次,但因為有4位未黎過,所以就帶大家一齊去啦!再者咁早就未有鋪頭開啦!係咪?到了淺草,大家一定會諗到指定觀光點,對!沒有錯~~就是淺草寺、雷門大燈籠、大草鞋,以及手信街,最後就是淺草的落語傳統技藝劇場。 因為時間緊迫,所以大家都快步行走,一到淺草寺,已經見到好多旅行團各據一方霸地盤,我地去度已經人山人海,只不過是9:00左右,D鴨仔真係好勤力呀!到寺院門口,我們個個都去左求籤,而日本人有個好得意既習俗,就係求完籤自己去取籤紙,睇完之後默默禱告,之後將籤紙打結繫在附近的祈福架上。當然求籤要自動自覺畀錢呀~~(日本人是很自律的,而我們也不可以影衰我地港澳人,對不對!) (大合照) 之後大家觀光一返,拍下照,之後就到寺院前的仲世見通逛一逛,不過d野都幾貴,想買都買唔落手啦!最後係雷門燈籠留影,這個是必做動作啦,還叫一個日本婆婆幫我地手tim,佢好好人立即答應了! (個人獨照) 完了淺草雷門的行程,我地好快落返地鐵,向平價天堂集中地的上野進發,到了上野尋找廣小路出口,一出車站,我們見到一間七層高的玩具店,它叫YAMASHIROYA,是較大型的玩具百貨,不論食玩、扭蛋、公仔、模型、電子玩物至主題玩具都有,真係男女都ARM行既toy shop呀!我們逗留左成個幾2個鐘,因為太大啦,所以要搵返佢地都好難! 終於買到一袋二袋離開YAMASHIROYA,轉入橫街走入『阿美橫町』,就是我所說的平價天堂,在此個個大有斬獲,女士們竟然在一間鞋店內狂殺價,最後她們每人買入一對日本布鞋,以港幣$12.5一對的價錢,而我亦以港幣$60的價錢買入一對gen皮男裝布鞋,之後仲有8折優惠卷送返比我地,真係成為佳話,我真係講到而家呀!之後之去了二木の菓子掃零食及手信。最後去了位於街內的一間壽司放題,一個價錢吃得飽飽,只不過是1070 yen。(但各位到日本要注意,叫的東西一定要食哂,唔可以剩下,否則要支付雙倍費用呀!) 雖然只在上野逗留了4小時多,但我們已經買了數十袋戰利品啦!不得不回酒店卸下行裝。 回酒店卸裝後,我地前往銀座的中央通逛一逛,以及在和光鐘塔前留影。其實銀座因為高樓大廈太多,所以街道沒有什麼陽光可言。之後到了澀谷,一出車站就感受到擠迫,人太多了,而且那些縱橫交錯的斑馬線,我仲特登爬高影低d人流,真係幾恐佈ga~~ 上圖:銀座中央通的和光鐘塔;下圖:銀座中央通 行了數間商場,買了TACO燒食,之後就去原宿啦!原宿的竹下通,我們訂好只停留1小時左右,大家就立即去買自己想要買的東西,女士們一到此又有大斬獲啦!又衫又袋,但我地呢d男士就真係冇野arm買,why?賣男裝的鋪頭都係以滑板裝那些潮服為主,我又點會arm呢?之後我就去左全日本連鎖規模最大的藥妝店幫d姨媽姑姐搵藥膏,以及睇下d gel及洗面用品。跟住見仲有d時間咪去左吃班戟才回集合地點,等齊人就出發去最後一站新宿啦! 上圖:澀谷地標109;下圖:澀谷車站內的斑馬線 到達新宿已經是晚上7點左右,我們去行下d商場,因為有好多都準備關門了,所以草草一逛就算。之後就去了思出之橫丁找食,但好像沒有大家的心水,最後大家都係決定買松屋ga,因為有人已經餓到死死下,所以都冇點樣繼續去搵,食返我地最熟識的飯店吧! 上圖:新宿街道 食完飯就去了新宿的歌舞伎町見識下,當我們一入去,見到好多黑人,我們初時以為是遊客,但原來佢地係"扯皮條"(原來日本都有輸入外勞,不過佢地d工作都幾特別播!),他們個個拎住一個牌係度叫賣。而且我地見人流好多,就想出返去,因為都幾恐怖啦~~正當這時,我們其中一位朋友(除了我之外,他是另一位帶guide),就比一位黑人扯皮條行埋黎摸佢個胸,而口中以英文講:"你應該有興趣,有需要吧!"。而我個friends就撥開那個黑人的手,快步向前行,當時我就係佢隔離,所以睇哂成件事的經過。(這件事都算係旅程中一段難忘經歷!) 最後我地以最快的步速離開歌舞伎町,並在一丁目的牌下拍照後,就回池袋啦!(其實新宿的歌舞伎野一丁目比較雜,切忌單獨進入,內有"泥捧",又有扯皮條,又有鴨店,所以男女進入都唔多安全,所以要一大班人行事,我地係門口影相都好驚,驚有人行埋黎偷野,亦都唔敢搵人幫忙影相,唯有我自己影啦!) ---------------------------------------------------------------------------------------(橙色字有hyperlink,可以連結到之前所說過的地方)日語教室:泥捧 - 小偷TACO燒 - 章魚丸---------------------------------------------------------------------------------------編/攝:阿乃 本 著作 係採用 創用 CC 姓名標示-非商業性-禁止改作 3.0 授權條款授權.
- Advertisement -
Macau, MO
28 ° C
29 °
27 °
83 %
1.5kmh
0 %
週三
33 °
週四
31 °
週五
31 °
週六
30 °
週日
31 °

社交網絡

8,759粉絲Like
902追隨者Follow
7,718追隨者Follow
35追隨者Follow
13追隨者Follow
148用戶訂閱

最人氣文章