fbpx
30.3 C
Macau
星期四, 七月 18, 2019

019 澳門人講飲講食:西灣安記 (澳門特色)

019 澳門人講飲講食:西灣安記   它是一間老字號茶餐廳,佢最出名既係豬扒包。大家唔好以為taipa的大利豬扒包先係澳門豬扒包,呢間都係澳門豬扒包既俵俵者! 我最鍾意食佢d豬扒系列,包括:1. 炸豬扒干撈意  18蚊2. 豬扒包 / 多 (一定係炸ga)  8蚊3. 炸豬扒燴意  18蚊 除左豬扒系列之外,仲有好多選擇,佢粥粉面飯、腸粉、包乜都有。仲有d好攪笑既包,如駱駝肉包......不過本人就未試過啦! 佢既老鋪位於南灣既燒灰爐巴士站,可乘搭新福利6、9、9A、28B到達。仲有其他分店,包括位於:(中區)板樟堂 大堂巷聖安娜隔離(松山)何東中葡小學 對面(新口岸)中華廠商會大廈隔離好似仲有分店ga,不過唔係好記得啦~~ Tips:澳門馳名中外的澳門豬扒包賣點大解扣大利豬扒包  係  自製炭烤包為賣點,而唔係塊豬扒,而且佢豬扒有骨。西灣安記豬扒包  係   塊豬扒為賣點,它是用天婦羅的方式去炸豬扒,而且冇骨。葉熾記豬扒包  係  澳門首間發明豬扒包的食店,簡單來說就是澳門第一豬扒包,澳門豬扒包發源店。 咁大家可以按需要去食屬於澳門的豬扒包啦!ps.除大利外,另外的都唔駛排隊~ 其他澳門blog友可以幫我補充ga,又或者你的意見!我知道應該冇人未食過呢三間既豬扒包!(本人就最唔like大利,因為有骨,一不留神就咬到牙痛)thanks~~ 編/攝:阿乃

018 澳門人講飲講食:忙裡偷閒 (台式飲品)

018 澳門人講飲講食:忙裡偷閒 它是一間位於皇朝區酒吧街的一間台式飲品館,以Mickey Mouse為主題的食店!我成日都鍾意去呢間店,原因係我鍾意食佢既招牌小火鍋。   這個小火鍋只需40幾蚊,有麻辣 / 豬骨湯底,仲有佢地獨創的 "奶茶湯底",不過本人覺得個奶茶湯底唔係太好囉~~呢個小火鍋一,二人用就arm arm好! 除左小火鍋之外,我仲鍾意佢地既其他小食:1. 棺材板 (忌廉海鮮餡) 10幾蚊2. 炸芝士狗 (即芝士釀入獅子狗內)  18蚊3. 炸蝦餅  18蚊4. 炸魷魚鬚  18蚊 仲有佢地d飲品呀:1. 芒果綠茶 / 荔枝綠茶 + 彩色笱篛2. 芒果沙冰仲有d自創既飲品......不能盡錄 食品都幾唔錯ga!不過飲品就太甜,次次都要少甜或者叫佢另外比一杯冰加落去!如果去的話,人數就唔好太多,因為d檯比較細,而且好難拍到檯!最大果張檯係6個人! 係既環境好好,全部都係米奇老鼠既擺設同裝飾,連d碗、盤、碟、檯布等都係米奇!如果你好似我成日來咁,老闆就有折扣優惠卡比你,仲有得儲印花換米奇既精品ga~~ 現已經遷往高士德區呀! 編/攝:阿乃(由於是由手機拍攝,質素比較差!)

017澳門人講飲講食:皇朝區 葡萄園餐廳

今日為大家介紹的是皇朝區的葡萄園餐廳。這間餐廳逢週未及假期最好就book定位先啦!內部環境及格調都非常好,就此亦拍了數張給大家看看! 價格方面就偏貴,而味道方面就很不錯呀! 今次我地美食團又再出動啦!本次有四個人一同前往,我地叫了以下的項目:1.黑椒牛扒2.忌廉薯絲焗馬介休3.忌廉芝士燴意粉4.有汽提子汁x1、有汽蘋果汁x25.鮮檸雜飲 最後位位85元付款!我最欣賞就係忌廉薯絲焗馬介休,我好耐冇食過啦~~非常好食~~第二位就係黑椒牛扒,需說是6成熟,但其實都已經係9成熟,所以我會食,而且我覺得好好食!第三位就梗係個意粉啦!因為冇乜驚喜,大部分食店都一樣ga啦!(因為我鐘意食忌廉、芝士呢d,所以今餐我都好滿意呀!) 美食評分:89分 (美中不足係價錢稍貴,唔可以成日都黎食囉!) (仲有一部分相係 "相簿" --> "澳門食店" )編/攝:阿乃

016澳門人講飲講食:望廈台北小泉居

望廈區的小泉居,是一間格調與其他的小泉居不同,而且長時間滿客的。價格與其他小泉居係一樣。 到達方式:任一交通工具,於望廈體育館 或 新益花園 下車即可。 現在就看看內部環境吧!這是二樓玄關的盤景藝術。   這是以日式或中式涼亭設計的雅座,可坐四至六人。 我去這店至愛的窗邊舒適大梳化,好舒服ga!比樓上的木椅好坐,所以好多人都鍾意坐,以及等有人走時再轉到這些位置! 這是我點的冰水果茶,不過比我食哂d生果,同埋飲到所剩冇幾先影相~~ 我其實都幾鍾意去呢度hea~~真係個feel好好,而且餐飲都唔貴,又易泊位左,所以都係一個不錯的hea站!而且呢度做占卜真係一流ga~~不論氣氛與格局!編/攝:阿乃

濠食新煮意Food Idea

濠食新煮意Food Idea為澳門一互聯網綜合飲食指南,目的是為公眾提供全面的飲食資訊。資料庫現時擁有澳門過千間餐廳資料,並且會不斷更新,務求將全澳食肆資料納入其中。 這是從Blog友 Mel 引用過來的,如果各位想知多d,想了解多d,可以用下面的引用link,linking去她的blog度看看呀! http://www.foodidea.net/ 我亦希望大家blog友,下次來到澳門會找到更多好食好玩的地方,所以我會一直為大家提供澳門的食肆、好玩、休閒拍照等地方!期望各位一直多多支持啦! 阿乃

015 澳門人講飲講食:日本北海道美食館 (美食廣場類)[已歇業]

015 澳門人講飲講食:日刺北海道美食館 (美食廣場類) 位於漁人碼頭的東西匯聚內其中一楝建築物,這楝建築物有三間日本食店,一間(地下中堂)係sale新鮮魚生及壽司,一間係(地下內堂)日本北海道美食館,仲有一間係2樓吃一d高檔d既日本美食。 我今日同大家講的是位於地下內堂的 "日本北海道美食館",它是一個日本美食廣場,有飲品店,及四檔日本美食(包括:炸物及小食、便當定食、中華料理及丼飯、烏冬及拉面)。 我們今晚三人行到了試吃,買既野食雲集四個檔的,大家可以看看下圖:(首先是我們全部叫的食物及飲品,每位約70元就可以埋單,是檯面上所有的呀!) 食物清單如下:(共mop$223)(1)一set滑蛋吉列豬扒飯連烏冬+酸菜 mop$40(2)一set炸天婦羅飯連烏冬+酸菜 mop$48(3)一set辣蝦定食 連麵豉湯 mop $45(4)兩客牛肉漢堡薯餅 mop$30(5)一客日式炸雞件 mop$15(6)兩杯鮮檸特飲 + 一杯鮮橙特飲 mop$45 我地先講講份量,一set基本上已經夠哂飽,只不過我地第一次入來試,諗住試多d品種,試試個質素ok唔ok,而且我地又影相,d服務員仲以為我地係飲食專欄記者tim~~我叫我是(1)號,基本上非常美味,豬扒有口感而不太韌,幾好食,飯當然用珍珠米啦!至於個素烏冬d味都非常好,而且我like食面、烏冬多過食飯呀!haha~~ 小食方面呢,先講牛肉薯餅,這個就真係推薦大家去食,唔會太滯,炸著蓉餅中間夾了粒粒牛肉碎,口感一流,味道唔會太鹹,真係唔錯,而且又附了一個唔知乜醬,但係大家都冇點,可能醬既味道不太好!可改善的地方是著餅皮可以再脆一點就真係一絕啦! 雞件方面,表現一般,賣相亦一般,味道偏鹹,所以要飲多d水,一一般般的水準,但就唔會有骨,剩係有肉姐! 飲品方面都不俗,我叫的是鮮檸特飲,其實是一杯青檸梳打+少少雪碧,酸酸地又帶少少甜,都幾唔錯呀!15蚊一大杯,都裝得幾滿,唔錯!至於另一個friends就叫了鮮橙特飲,是一杯橙味soda,同我地果d差唔多,不過有樣好笑的是,佢塊橙剛剛就隻杯咁大,好惹笑! 總括來說都幾ok,不論賣相、座位、環境及味道方面。今餐我畀85分,唔知其他兩位試完有什麼評價呢?如想看多d相,請到相簿-->澳門食肆,謝謝! 如果要看其他兩位同行者的評價可到下列topic:魚魚Cafe:又到星期六,你有乜節目?雯雯~~豬:北海道美食館......

014 澳門人講飲講食:東望洋餅店 (西式餅店類)

014 澳門人講飲講食:東望洋餅店 (西式糕點類) 位於皇朝區成昌後面,它是一間Coffee shop + 西式餅店。價錢公道,比一般的coffee shop平少少,格調好潮,帶有葡國式的擺設,不俗呀!我成日都會買迷你芝士批(5蚊3個),仲有芝士軟包(5蚊個)。但次次都趕時間,一係就食左野,所以未坐低飲野呀!我d friends話好好,味道ok! (下圖是店內座位區及擺設) (下圖是由門口影入去,是否很不錯呢?左面冇影度的是面包區) (下圖是服務台,下方沒有影的是西餅急凍櫃) 由於佢唔比人地影佢地D西餅及面包(可能驚人抄野,及對方來check價掛),而我亦先徵求佢地既同意,佢先比我影幾張相! 講返佢d面包,其實會比聖安娜貴少少,西餅就比金滿堂平。佢重有曲奇餅同生日蛋糕訂造等,基本來說都是一間不俗的店,每逢中午、傍晚都好多OL、辦公室人員去買野食,而六、日就多d去hea既人。 交通方法:巴士 1A、8、17、23都可到達皇朝區,在成昌附近巴士站下車即可。步行至餅店約半分鐘。(皇朝區由於好多香港人都唔識去,所以建議大家看一看澳門地圖做少少資料搜查,再唔係上到車問司機。)(因為皇朝算係澳門的飲食集中營,什麼菜都可以用皇朝區找到) ------------------------------------------------------------------------------------------Update :2006-06-11 9:40pm  (新加入下列兩幅新相) 下圖是堂食區的舊澳門相片牆壁,多了一份緬懷澳門的格調! 這是由堂食區影去counter,有少少手震tim~~ 仲有一張係堂食餐牌,大家可以去 "相簿--->澳門食肆" 度找一找,不便貼人地d價目出來! 編/攝:阿乃

013 澳門人講飲講食:銀禧粥店 (粥品麵食類)[已歇業]

013 澳門人講飲講食:銀禧粥店 (粥品麵食類) 這間又是伴隨澳門中區成長的老牌粥店之一,現在比而前貴了好多,但仍然咁好食。位於白馬行的Inshoe's Net對面,由議事亭一直向bodyshop行,到bodyshop後再直行到g2000 & u2後,再直行就到。 銀禧粥店再直行就是國華、信達城、天神巷啦! 它的粥品、湯麵都很不錯,唯獨比較貴,要成14蚊一碗,比起黃枝記平,但比起盛記就貴左一倍呀!當然盛記沒有麵食,粥亦只有皮蛋瘦、白粥兩款啦。 大家行到肚餓,但又唔想吃小食、甜品,想清清地,除了新馬路果邊的盛記白粥,噴水池那間貴到嚇死人仲要排隊的黃枝記,還有一間銀禧呀! (都係未有影相,遲d補貼返啦!)編:阿乃

012 澳門人講飲講食:國華小食集中地 (街頭小吃類)

012 澳門人講飲講食:國華小食集中地 (街頭小吃類) 位於白馬行國華戲院地下,是現在中區的小食集中地。 有很多很多野吃,包括:韓國烤魷魚、夾餅雞蛋仔(跟009所講的同一老闆)、魚蛋小食(是009所講的老闆開的)、台灣可樂餅、各式果汁、鮮果撈......都有。 每逢放學、假期、節日,那裡絕對係人山人海,真係針都插唔入呀!而且價格都係好平,從幾蚊到十幾蚊左右。果汁大大杯;鮮果撈就生果滿一杯,果汁少。 各位如果過來澳門,除了懂得去我以前講的大堂巷、大堂街、議事亭之外,還是懂得行白馬行呀!白馬行就是議事亭尾的U2、G2000之後的行車路,這條白馬行可以一直通去水坑尾,荷蘭園波鞋街。身為精明的你絕對要識呀,可以慳返搭的士的錢,而且又好快到荷蘭園呀。 參考時間:(由議事亭、板樟堂的U2,G2000出發)回新馬路     步行2分鐘到草堆街     步行30秒到大三巴     步行2分鐘到大堂         步行1分鐘到國華         步行2分鐘到水坑尾     步行4分鐘到荷蘭園     步行6分鐘 (未有時間去影相呀!遲d補貼啦!)編:阿乃

Extra 澳人講飲講食:漁人碼頭 high tea 麵包湯[已歇業]

上星期同友人一齊去漁人碼頭的阿拉拍商場內一間小食肆high tea(其實一早有預謀去果間野食ga)。 為什麼?就是為了想試試它的麵包湯。 上次食麵包湯係3年前,係tapia的大台北食,它的麵包湯非常唔掂,點解我咁講呢?雖然佢d湯都好好味,但食麵包湯,當然係食埋麵包啦,對不對?但大台北的那個裝湯的農夫包,簡直同石頭冇分別,我叫waiter比一把切扒的刀我,我都切唔到,個包仲絲毫不損,用左1個鐘先切到小小來食,你話幾恐佈呢,所以我以後都唔食佢d麵包湯。 今次都係想試試在漁人碼頭新開那間我麵包湯得唔得。當日下午4點左右,我們到了漁人碼頭啦,泊左車就去那檔食肆(我冇留意佢個名),之後每人order左1個麵包湯,另叫1客薯條share,之後仲每人叫了1杯檸樂tim,位位$48蚊埋單,都可以接受。 講返個湯,湯呢就淡左少少,都ok夠杰,如果杰少少更好,因為係周打魚湯。再黎講個包,包一樣選有農夫包,但包非常鬆軟,好好味,飲到一半之後,絕對沒有難道就可以用手撕d面包浸湯食,不像大台北那個 "硬石頭" 用刀都切唔到囉!非常不錯的一個High Tea呀!唔好睇相好似冇乜湯,其實佢都幾深,而且中間又闊,都裝到幾多湯呀!這個湯28元,薯條一客15元,檸樂要15元(比較貴)。so可以接受的價錢~~ 至於薯條也是挺不錯的波浪薯條,不過不失。檸樂呢,檸檬都幾多,但冰也不少。haha~~如果大家下次去開漁人碼頭,不妨去試一試!佢係收晚上7點ga~~所以中午至下午去就最fit啦~~坐位方面分有店舖內,跟露台海景檯。店舖內有少許冷氣及LCD播放演唱會,露台就冇冷氣同冇LCD,你們自己考慮位置吧! 它是位於一間賣參茸的店舖(好似叫東方紅)隔離,記住係阿拉伯商場內,不是羅馬鬥獸場的正官莊隔離呀呀! ------------------------------------------------------------------------------------------------編/攝:阿乃

011 澳門人講飲講食:法跡三文治專門店 (輕食類)[已歇業]

011 澳門人講飲講食:法跡三文治專門店 (輕食類) 位於賣草地菓子天地隔壁,金錢餅主鋪對面。由澳門本地人自行創立的法式面飽咖啡館,好似starbucks、supersandwish、angel咁,不過就平好多。 它原來是我一個朋友的阿哥同朋友一齊開的,所以都要係度幫下手做下宣傳先!開店時澳門日報曾連續幾日都有報導、專訪咁樣呀! 它的招牌:牛魔王芝士煙牛肉飽 $22非常好食,我都食過幾次,而且個飽超大,如食飯的話一個剛剛好,女士的話可能要2個人Share,下午茶都要啦! 另外可配d咖啡,是日餐湯,或者我至愛的檸檬梳打,都係10多元,非常抵吃抵飲!但內部佈局通常只供4人、2人為主,因為地方有限,而且以2、4人檯為主。除了飽之內,還有意粉同飯供大家選擇,上次食左個墨魚汁意粉,都好好食! 如果講漏野or有野補充的話,stella你回應啦~~可以宣傳下嘛!同時澳門第一間無煙食肆呀!(我冇收宣傳費ga,真係覺得好才推介比大家!)(相用手機影,所以比較差,希望唔好見怪。) 編/攝:阿乃

010 澳門人講飲講食:金錢餅 (小食類)

010 澳門人講飲講食:金錢餅 (小食類) 位於議事亭前地的仁慈堂門口,有一檔由細細個就食開的小食車仔,只賣一種食品,就是金錢餅。其實佢有一間主鋪頭,位於賣草地的"菓子天地"對面。 它們都是用最古老的紙皮盒裝的,澳門現在冇乜邊間有呢d懷舊盒啦!復活節假期時帶D香港朋友飲飲食食時,經過影左張相比大家睇下。當日非常多香港人排隊買食,而主鋪更話唔賣啦~~佢而家做果D人地訂哂ga,冇現成的賣比人,叫大家去返仁慈堂度排隊買啦! 你話佢厲唔厲害呢?好生意到唔接添呀! 編/攝:阿乃

009 澳門人講飲講食:全城出名雞蛋仔(街頭小吃)

009 澳門人講飲講食:全城出名雞蛋仔(街頭小吃) 今日同大家講埋大堂斜巷一檔同阿爸傳到去個女既流動小販檔,又係好耐歷史ga啦,我細細個食到而家,每逢放工放學、星期六日、公眾假期佢都係非常多人買ga,而且平常都有好多市民都專登駕車來買。 上圖中你地都見到你幾個人買緊or等緊。今日影相既時候,見到阿爸同阿女都一齊係度,大家認住佢地個嘜頭啦!只此一家呀!位置就係之前007,008所講的同一位置,只不過係金滿堂、暹邏對面時代停車場入口處。 佢算係澳門最出名的街販雞蛋仔夾餅檔,佢只有三樣野賣:1.雞蛋仔2.香蕉糕3.夾餅 點解咁好食?因為佢地d蛋漿係自己每日調配,日日新鮮,賣哂就收檔ga啦!我都有係澳門其他地方吃過,一係就顏色唔靚,味道又淡,一係就整得太難食。香港都有食過旺角灣仔d檔口,當然就更.....難吃啦(我絕冇踩香港雞蛋仔的意思,各位唔好誤會,而不過我覺得香港d雞蛋仔一早整定哂,食既時候凍冰冰又硬卜卜,雖然味多,但此終原味及熱呼呼時食最好!) 而我最鍾意食佢既夾餅,唔係雞蛋仔,因為佢既夾餅唔知點解會咁好食,自己都整唔到佢個味,其他檔又學唔到,而且都有好多人去買夾餅為主tim。有次我買緊既時候,有個阿叔走埋黎話要買10份夾餅tim,其實一d都唔出奇,因為成日有人都係咁賣返屋企食,當下午茶。 價格方面好係4蚊澳門幣一份夾餅,雞蛋仔好似係6蚊一排,香蕉糕就唔記得啦! 下圖就是大堂斜巷,見唔見有個禁止符號既牌呀!沿住呢條行人道一直行落下,你就立即見到啦!如果都係唔識去的話就問下人啦! (下一回我地返去議事亭前地同賣草地! 010:澳門人講飲講食 )編/攝:阿乃

008 澳門人講飲講食:暹邏小館 (泰緬式美食類)[已搬往氹仔]

008 澳門人講飲講食:暹邏小館 (泰緬式美食類) 還記得上一期的金滿堂嗎?其實今日介紹的 "暹邏小館" 就係金滿堂隔離。"暹邏",音讀 僣羅,僣建個僣的讀音。 其實佢已經好耐歷史,我細細個就已經食佢d野,好好味!年前佢重新裝修過門面,所以好似好新咁,唔知係咪裝修左既關係,佢d野貴左好多,平均叫個緬甸面+特色飲料就已經30幾蚊。 中午去的話可能會冇位ga,因為好多人都會去食,附近商廈都好多,而且佢開到晚上十一點(冇記錯既話),吃宵夜都可以呀! 阿乃推介:碎肉魚蛋粉、泰式炭燒豬頸肉、三色冰、青檸冰、雞絲撈生面、富貴魚等泰緬餐館招牌!泰式炭燒豬頸肉就30幾蚊一大碟,兩人share就差唔多,絕對可以與香港d高級餐館70幾蚊得十幾塊既比,色香味都俱全。而雞絲撈生面呢,香港人可能唔知係乜野,但澳門有好多泰緬店都有供應,"生面"口感好彈牙好Q,幼身似電左曲髮既幼面咁。我喜愛青檸冰,酸酸地,又好冰涼,開下胃,非常不俗的飲料! 其他仲有其他好多好多,不過我都未試哂,還有就是我比較揀食,所以有些海產及一些蔬果我都唔食,唯有靠其他澳門blog友幫手就補充啦! (下一回:009 澳門人講飲講食)編/攝:阿乃

007 澳門人講飲講食:金滿堂(高級西餅類)

都繼續留係大堂區講飲講食先,還未離開此區呀! 007 澳門人講飲講食:金滿堂(高級西餅類) 今次我所介紹的是一間高級西餅店,它在澳門都有數載,初初店舖開設於澳門波鞋街(荷蘭園大馬路),之後就開左係大堂斜巷呢度啦,之前仲係OK果個位,半年前才擴充營業,搬左過去隔隔離大的鋪位至今,提供各類西洋蛋糕及面包,而呢間店鋪就係"金滿堂"。 佢D西餅其實就同餅店差不多,但多了一些意大利芝士餅、意大利蛋糕等等,還有我的最愛Tiramisu,每杯6元或每件8元兩種,咖啡味濃又不覺膩,Rum酒味好香,唔會有飲酒那麼重口味,所以唔飲酒或不鍾意飲酒既都可以食(因為我都唔飲酒)。另外仲有拿破崙蛋糕、芝士餅及綠茶cake都係好好味。 在澳門來說它算係貴價西餅之列中最平既一間,當然平過高士德區的日本聖誕老人啦!如果你仲係留連緊九如坊呢D,本本旅遊書都標榜d食店,不如試下其他平平地又味道不俗的! 到達方法:可由南灣大馬路的"HSBC匯豐銀行"進入,或由大堂巷、板樟堂巷經耶穌十字廣場進入(下2圖)。(下一):耶穌十字廣場(下二):大堂斜巷(耶穌十字廣場教堂旁入口)   (下一期:008 澳門人講飲講食)編/攝:阿乃

澳門人講飲講食:番外篇食肆地圖

各位,今天放工時,終於途經此區,我立即就拿出我的SX833充當相機,影返之前介紹比你地既食店d相,全部已經更新哂,你地可以去返之前D網誌度看看。 另外,有些地名需要改正,一直我說的大堂斜巷,其實真名叫"大堂巷"(所以網誌經已更正了),大堂斜巷係另一條(見上面的手繪地圖)。 本來我想影埋002所介紹的第一檔魚蛋檔,可惜佢今天又休息,所以沒影到。但我就特意你看看佢叫乜名,原來叫"陳林記",我食左咁耐都唔知佢叫乜名,真係攪笑。 上面的手繪地圖是我畫出來的,比較核突,但明確標明街名、位置以及方向,大家仔細留意一下啦!但006的金寶其實都係附近,應該係地圖的左邊大堂街箭頭行下去就見到啦!(因為我驚d字太細,所以唔敢畫得咁仔細,否則乜字都睇唔到!) 下圖是從土木實驗室影返過去廣場,看看,真係有十字架ga,我冇扼你地ga,唔係淨係得個名ga! 編/攝:阿乃

006 澳門人講飲講食:金寶茶餐廳、金華美食(澳葡美食類/茶餐廳)[已歇業]

006 澳門人講飲講食:金寶茶餐廳(澳葡茶餐廳)、金華美食(澳葡食店) 金寶茶餐廳,又係一間見證了澳門議事亭變遷的食店之一。以前的地址係噴水池M記對面的CTM及LEVI'S,因前幾年鋪租狂飆而結業,當時佢有4層樓ga,現在遷往白馬行葡文書局旁斜路,繼續營業,但店舖細了好多,但都有兩層。 金寶茶餐廳在以前係一間好普通的舊式茶餐室,門口有西餅蛋糕賣(現在新鋪都有),當時佢隨著營業額,客人口味咁,不斷變化成為一間有澳葡菜的茶餐廳,一、二樓保留懷舊茶餐室方格,三、四樓設計高檔,成間高級餐廳咁ga,不過現在搬遷後,需保留西餅部分及繼續維持水準,但比以前的確少左d菜色。 新店的風格與大部分茶餐廳沒有兩樣,但菜色仍保有一定的澳葡菜色,價錢平味道不俗。兩層高但坐位不多,食飯時間往往爆滿,而店內牆上掛滿澳門舊時的歷史相片,問d伙計,佢地話係老闆的珍藏,有好多好有歷史性,亦比各遊客看看以前的澳門小城有多美,又讓我們澳門人回顧一下以前的澳門,不竟城市發展就免不多要犧牲一些東西,這是等價交換嘛!(blog主 鋼鍊上腦中......) 每逢我帶d香港朋友去食野,佢地都係咁問我果張相即係而家邊度呀?果時發生乜事呀?以前既議事亭原來係咁ga?......好多問題,反映原來大家都唔係淨係得個賭字來看澳門,佢地都好想了解下澳門既事,咁arm本人係讀旅遊系既,又有修澳門史,當然就為佢地解答左問題啦!有d朋友都覺得唔夠,我就帶佢地去買左一本"澳門街道的故事" 等佢地帶返香港。 言歸正傳,如果想吃澳葡餐,又唔想咁貴的話,佢都係唔錯的選擇,但就茶餐廳口味,大眾化一點囉。 --------------------------------------------------------------------------------------------金華美食,係金寶對面,以前叫大堂風行餐廳,以前係澳葡餐,之家基本上都唔係好多澳葡菜色,跟一般茶餐廳不大分別,但佢會有d特別的菜色,唔係間間都有得食,而且價錢平,份量多,味道好,所以食飯時間又係爆滿ga~~所以就介紹埋比大家囉!-------------------------------------------------------------------------------------------News:金寶茶餐廳現已搬遷,新鋪還未開張!(update at 2007-8-20) (下一回:007 澳門人講飲講食)編/攝:阿乃

005 澳門人講飲講食:大堂炸雞(快餐類)

005 澳門人講飲講食:大堂炸雞(快餐類) 麥當勞、大家樂、肯德基大家可能都幫襯唔少,但我們澳門其實係03年既時候開左一間屬於澳門道地土炮炸雞店,它的名字叫"大堂炸雞",基本上係澳門人都會食過,佢地整既雞絕對好吃過澳門果隻肯德基,而且大堂炸雞的雞味道獨特,又係即叫即炸,非常新鮮,但此終係油炸食物,所以唔好多食。 店鋪係大堂街,可由郵政局旁樓梯(友邦中心對面)、仁慈堂旁斜路直上、主教座堂的十字耶穌廣場附近都可以到達,距離噴水池2分鐘步行,距離之前介紹的大堂巷食店約1-2分鐘腳程,佢門口有隻Q版大白雞做招牌ga! 食物價格方面非常之便宜,差不多是肯德基一半左右。阿乃推介:1.炸雞脾(超大隻) 7蚊一隻,2隻又平d,3隻再平d,佢係實行買多d平多d。2.炸連皮薯角,又係好大碟,而且仲好好味,唔似有d店鋪炸到"林姐姐",咬都咬唔開。3.薯茸,佢真係用薯仔整成糊狀,好香薯仔味,可以加沙律醬。唔似其他店舖咁用粉開,亦唔似肯德基果d"希冧冧"又冇薯味。4.如果多人一齊吃就買個 F餐(唔知有冇改名),好抵吃,有3隻雞脾、3隻雞全翼、3杯汽水/涼茶、2枝粟米、一碗大薯茸,3、4個人絕對都夠吃,大食的2個人啦! 另外佢D雞扒飽、意粉等就見人見志,有人話好有人話唔好食。但大家記住食佢既炸雞,一定要落淮鹽先至好吃,如果唔係唔夠野味呀!如果講漏左野或其他澳門朋友有補充的話,歡迎回覆呀! -------------------------------------------------------------------------------------------------------(下一期都係繼續介紹議事亭附近的食店、小食館,各位可能要自己PLAN下應該要點食法先可以一次食哂又唔會飽到行唔郁啦!haha) (Update:2006/03/29)編/攝:阿乃

003,004 澳門人講飲講食:三可餅家(已歇業) + 檸檬車露(甜品類)

今期一出就二回,事關都係附近,所以一次滿足大家兩個要求,手信及雪糕呀!大家係咪覺得澳門除左賭就冇其他野?其實大錯特錯,澳門除了賭仲有幾百多年的歷史文化、建築、各地及澳門菜、街頭小吃等,剛剛仲申請埋世界遺產,又有漁人碼頭、觀光塔等新玩意! 咁仲點可以用一個 "賭" 字來形容我們的澳門呢?應該叫 "多姿多采的文化名城" 才對!跟我吃盡澳門人道地街頭巷尾小食及風味菜,行盡大街小巷探索澳門小城,絕對比你入賭場更加開心! 003 澳門人講飲講食:三可餅家(中式餅類) 三可餅家,見證了澳門議事亭的變遷。今日的三可與昔日的三可變化很大,昔日的三可位於現在板樟堂的bodyshop + 克氏雪糕店 的舊樓,因為當時要清拆及重新裝修的關係,被迫結業,與當時隔壁的小小書店一樣命運,需小小書店已經不在,但三可餅家於數年前再次續業,開左係對面大堂巷裡面 (恆友魚蛋隔離),與舊址只有數十步之距離而已,佢會好多出名的餅,如雞旦餅、盲公餅、雞仔餅、杏仁餅、牛耳等。 價格方面好大眾化,唔會好貴,而且佢仲係用以前的紙盒包裝,黃底用紅藍白三色寫上三可餅家及其他圖案,非常之古式風味呀! 而家好多香港都過來買"鉅記",講過秘密你地聽,其實鉅記係香港人過黎澳門開,都係近幾年先咁出名,以前澳門根本就冇咩鉅記,所以作為遊客,冇理由唔買d澳門歷史悠久既餅家ga?(我唔係係度拆人地招牌,只不過想大家來澳門食又好、玩又好、賭都好,都希望各位可以了解一下澳門的歷史文化,咁先叫做有得益嘛,才可以算得上 "讀萬卷書不如行萬里路。" ) 以前三可、咀香園、遠來餅家,係中區好有名既餅家,可算齊名氣,當然三家都有不同的歷史典故及不同經歷,遲d我都會同大家介紹遠來同咀香園的歷史及發展。 各位同為澳門人的blog友,留意一下三可好似又唔係大堂巷啦!今日放工去影返d相都唔見三可!係咪又執左呢?   004 澳門人講飲講食:檸檬車露(甜品類) 係三可、恆友對面,係上年開業的,賣點係老闆每日新鮮手打意大利雪糕,價格適中,10多元一個,買之前如果唔知好唔好味,佢地仲提供試食,比你試哂所以味先揀貫邊種都唔遲。 意大利手打雪糕,這是澳門人自己開的,而味道緊貼意大利人口味,就是偏甜,而且好似香港冇,香港只有紐西蘭低脂雪糕,所以來澳門就一定要試一試啦!而呢個意大利手打雪糕,佢地話都係fat free ga,所以一樣咁健康ga!本人就幾like佢果個芒果、薄荷朱古力。 ------------------------------------------------------------------------------------------------今集就講住咁多先啦~~下回再帶大家遊澳食下野,講埋佢背後既歷史啦!(下一回:005 澳門人講飲講食) (Update:2006/03/29)編/攝:阿乃

002 澳門人講飲講食:街邊風味魚蛋檔 (小吃類)

002 澳門人講飲講食:街邊風味魚蛋檔 (小吃類) 各位上回講左早餐,跟住我地又講下小吃啦!暫時介紹都係議事亭前地、板樟堂及白馬行一帶的,一來你地可以一次去哂,二來唔駛周圍搵,等我介紹哂這區的美食,再帶大家去一D比較少遊客去的區域呀! 今次介紹的是兩檔魚蛋檔,一檔叫"恆友",另一檔叫"陳林記"!(都是街鋪仔,唔係街邊檔,但仍保留車仔的特色),因為近年在澳已經不多見街邊流動小販,剩下三盞燈、紅街市一帶才有(放心,遲d我會介紹ga,不用心急呀各位!),這兩檔的地址係位於板樟堂的fancl house與SASA(U2隔離果間,唔好攪錯呀) 中間的斜巷仔,係叫"大堂巷",巷頭有旅遊資訊牌同數個藍綠色垃圾桶。 一進去就知道這條是食街,第一檔係呢條巷的聖安娜對面,叫"陳林記",它擺了各式各樣的熟食魚蛋,非常多種類,價錢由2蚊一串至6蚊一串都有,如你買得多的話就叫老闆娘比個蘿你,自己慢慢揀,之後佢就會即場幫你肏熟,好讓你慢慢品嚐。我每次去到都買成2大碗,都只不過係40蚊-60蚊左右,成5、6人一齊食都夠,有時仲多到可以當正餐tim。不過佢唔係成日開門ga,你去度就要碰下運氣啦!就算連我這些澳門人都常常食閉門羹ga~因為佢唔會貼出來說它明天休息的。 想食第二檔的話你就要行上少少,係檸檬車露對面、三可餅家及小熊貓隔壁,叫"恆友"的小鋪仔,出名的是咖喱魚蛋,彈牙有魚味,非常不錯,不過種類比前面的第一檔少,放學都好多學生去買ga~~價錢同第一檔價錢差不多ga! 你看看,今天下午5點左右人多得幾緊要!而這條仲有好多好野食,有d鋪頭背後仲有風光的歷史,如三可餅家、西灣安記、小熊貓、檸檬車露等,隔離街都有好多,當然在下一回我會逐一介紹。不過大家唔駛驚,去左附近問人,大部分都知ga!當然你要問arm澳門人or店舖職員啦!如果唔係問著一個都係遊客就真係~~hahahaha~~ --下回見-- (Update:2006/03/29)編/攝:阿乃

001 澳門人講飲講食:盛記白粥 (早餐/甜品糖水/輕食類)

前言 各位你們好!於早前本人已放左風聲出去講過將會開一個系列名叫 "澳門人講飲講食" ,是專門介紹澳門的美食餐飲,不論大街下巷,高級餐飲至街頭小吃,都會為你介紹! 另外,我儘量會介紹一D "澳門旅遊天書" 沒有的 (其實我並不知道那些是天書有介紹的,不竟我是澳門人,身於澳門,所以未接觸過這些書),不過可以肯定的是,儘可能唔會介紹D貴又唔好既野啦! 可以放心,絕對可以滿足大家貪吃的本性,當你仲留連係黃枝記、九如坊、安德魯葡撻及大利豬扒飽的同時(好似前3間香港已經有分店),澳門人已經唔多有興趣啦(因被大肆宣傳而不斷升價)!我地會去搵其他好食,可能平凡的店,其實更有小城風味! 其實我自己閒時都會同D朋友在澳門所處找尋新食點,而且我更喜歡小食、甜品及輕食類,所以有的更會影埋相比你睇。而網友早前亦回應本人表示支持此系列,在此向他們說聲謝謝!(因為如果冇人睇,那我就當然不會寫啦!對不對!) 希望各位以後多多支持此系列啦!此系列會不斷更新,收錄於 "澳門人講澳門" 內。 001 澳門人講飲講食:盛記白粥 (早餐/甜品糖水/輕食類) 我唔知旅遊書有冇介紹過 "盛記白粥",這是澳門比較出名的早餐、甜品糖水鋪,種類都幾好ga,分店又多,在雅廉訪幸運閣對面(9、16、8A、32號巴士);在議事亭前地的民政總署旁直入(去議事亭的巴士均可);在台山CTM隔壁(所有去關閘及新城市花園的巴士都可抵達)。 講完店鋪分佈及交通,當然要講下食物同價錢,晨早就好多人去吃早餐,它有一般粥品及油炸食物,而且有豆漿、豆腐花、燒賣、粽子、中式糖水等中式食品,另外還有它們首創的朱古力味豆腐花、芒果味豆腐花(好似仲有其他味ga,不過這兩款比教好味。)除了首創的口味豆腐花之外,它更時由開店至關門,全日供應各款食品,包括腸粉。所以幾時去吃都可以任你揀想吃乜。 另外一絕就是價錢平,10元8塊已經飽飽了,冇扼你ga,又有粥又有蘿蔔糕/腸粉/粽,都是10蚊左右,簡直係街邊檔價錢啦!對不對! 我最喜歡吃它的"皮蛋瘦肉粥",為什麼它會特別好食?原來內有乾坤,它的皮蛋瘦肉粥,除了基本食材外,還加入蠔仔去煮,所以特別好味,需本人不食蠔,但我都會食佢呢個粥囉!再者就是蘿蔔糕,它的蘿蔔糕成塊磚頭咁大,但非常軟滑,有少許"言茜"(唔識寫果個字)味,台稱:九層塔,加入自己喜歡的醬料,熱呼呼的,嘩!正~~只不過係幾蚊而已!最後,如果下午茶的話就會去食朱古力豆腐花、糖水等。它的炸腸也不錯,而燒賣就非常大粒,也很讚! 其實它還有好多野食,大家來澳時,如果酒店唔包早餐都可以去食個街邊檔價錢的早餐。它保留了昔日冰室、舊式茶餐廳的裝潢,小城味重,如果你叫粽或蘿蔔糕的話,你會發現佢用既碟係"鉛製碟",好有懷舊feel,據稱都是開張至今仲用緊(可能不同分店會有所不同) 最後教大家一些它的職員所用的術語,下次去食的話都可以跟佢地咁叫,會多一份親切感,好多常光顧的客人都識ga~~最常聽都的有以下幾個:(1) "白菜" -- 白粥+蘿蔔糕 (10蚊有找)(2) "咸菜" -- 皮蛋瘦肉粥 + 蘿蔔糕 (冇記錯的話係$8.5)(3) "咸粥" -- 皮蛋瘦肉粥其實仲有好多叫法,但我比較常食這些,另外的不太懂他們的術語,到時你可以問下佢地,不過記住返來話返比我聽播!haha~~ 今篇講住咁多先啦,下篇見! 編:阿乃

澳門皇朝區美食新概念

澳門皇朝區是近年本澳新興的區域,有著各菜色食肆及有名的食肆分店,本人帶過不少香港人去此處吃飯,他們均表示唔知呢度有野吃,指南冇介紹等,所以今天就介紹比各位啦!(如星期六、日去的話,有些食肆需要預早訂座呀,否則冇位要等多耐ga!)   以下推薦的是比較好,價格公道,色香色不俗的店舖喲!希望幫到各位到澳的遊客! 葡國菜---公雞(分店)、美嚼葡式住家菜、葡萄園、文化中心海灣餐廳、黃金海岸餐廳、飛萬鋰餐廳葡國扒房---扒王葡國餐、DEE 8墨西哥菜---TACOS意大利菜---經典意大利星‧越‧馬‧緬菜---星越館、豪庭葡式燒烤---媽閣長城燒烤(分店)泰國菜---泰皇泰國、志記泰式燒烤、寶記泰國餐館法國餐---CHEZVOUS(文化中心對面的法國餐廳)日本菜---水戶黃門、瀛、森巴壽司、吉島野、八王子韓國菜---東大門(正宗韓式)、李家燒烤館台式菜---台北小泉居、金寶島、凱茵閣、紅茶坊咖啡館---檀香山咖啡、上行咖啡、東望洋咖啡(意法式咖啡)、格子咖啡上海及中式菜---飲食男女、上海皇朝菜館、重慶館、佛笑樓(分店)茶餐室---豐德澳葡美食(滔滔介紹過)、星海茶餐廳、澳門皇朝茶餐室......中式飲茶---東皇朝海鮮酒家,金濠海鮮酒家酒吧---文化中心Bex、皇朝酒吧街輕食類---咖喱妹、武二 其實仲有好多皇朝區的美食,有些唔記得,而且真的太多,不能盡錄呀!謝謝其他blog友幫忙,助我寫上正確的店舖名稱! 註:紫色為最新update或更正的項目。Update:2007/8/28編:阿乃
- Advertisement -
Macau
薄雾
30.3 ° C
31 °
30 °
84 %
3.6kmh
0 %
週三
31 °
週四
38 °
週五
37 °
週六
36 °
週日
35 °

社交網絡

10,455粉絲Like
1,114追隨者Follow
10,545追隨者Follow
1,830追隨者Follow
29追隨者Follow
455用戶訂閱

最人氣文章